​

វិមានក្រឹមឡាំងនិយាយកាលពិថ្ងៃពុធថា ការប្រើប្រាស់គ្រឿងយុទ្ធោបករណ៍ផលិតដោយសហរដ្ឋអាមេរិក ដោយក្រុមអ្នកប្រយុទ្ធគាំទ្រអ៊ុយក្រែន ដែលបានធ្វើការវាយ​ឆ្មក់លើតំបន់ព្រំដែន​រុស្ស៊ីនៅ​សប្តាហ៍នេះ គឺជាភស្តុតាងចំពោះការជាប់ពាក់ព័ន្ធកើនឡើងរបស់ប្រទេសលោកខាងលិច ក្នុងជម្លោះនៅអ៊ុយក្រែន។

យោធារុស្ស៊ី និយាយកាលពីថ្ងៃអង្គារថា ខ្លួនបានកម្ទេចពួកសកម្មប្រយុទ្ធដែលបានវាយប្រហារតំបន់ Belgorod ព្រំដែនរុស្ស៊ីរួមជាមួយនឹងរថពាសដែកកាលពីថ្ងៃមុន បណ្តាលឲ្យអ្នកជាតិ​និយ​​មអ៊ុយ​​ក្រែន៧០នាក់ស្លាប់ និងបានរុញច្រានអ្នកនៅសេសសល់ឲ្យត្រលប់ទៅកាន់អ៊ុយក្រែនវិញ។

យោ​ធា​រុស្ស៊ី និយាយថា ខ្លួនបានបំផ្លាញរថពាសដែក៤គ្រឿង និងរថយន្តភីកអាប់៥គ្រឿង ដែលបានវាយរុញច្រាននូវអ្វីដែលជាការលុកលុយ​ធំបំផុតចូលមកក្នុងទឹកដី​ប្រទេស​រុស្ស៊ីពី​ប្រ​ទេ​ស​​អ៊ុយក្រែន ចាប់តាំងពីទីក្រុងមូស្គូ ចាប់ផ្តើមនូវអ្វីដែលខ្លួនចាត់ទុកថាជាប្រតិបត្តិការសិកពិសេសនៅអ៊ុយក្រែន ក្នុងរយៈពេល១៥ខែមកនេះ។ វីដេអូនៃ​យានយន្​តដែល​ត្រូវ​បានបំផ្លាញ​មួយ​​ចំនួន ត្រូវផ្សព្វផ្សាយដោយក្រសួងការពារជាតិរុស្ស៊ី ដោយបានបង្ហាញគ្រឿងយុទ្ធោបករណ៍ផលិតនៅអាមេរិក ដូចជារយន្តយោធា Humvee ជាដើម។

រដ្ឋ​​មន្ត្រីការពារជាតិរុស្ស៊ី លោក Sergei Shoigu បានសន្យាកាលពីថ្ងៃពុធថា ទីក្រុងមូស្គូ នឹងឆ្លើយតបទៅនឹងការវាយឆ្មក់ឆ្លងព្រំដែន​ណាមួយធ្វើ​ឡើង​ដោយពួក​សកម្ម​ប្រយុទ្ធអ៊ុយក្រែន​ភ្លាម​ៗ និងខ្លាំងក្លាបំផុត។

លោ​ក Dmitry Peskov អ្នកនាំពាក្យវិមានក្រឹមឡាំងបានប្រាប់អ្នកសារព័ត៌មាននៅពេលត្រូវបានសួរ​អំពីការប្រើប្រាស់របស់ក្រុមអ្នកប្រយុទ្ធនូវយុទ្ធោបករណ៍​ផលិតនៅ​ប្រទេសលោក​ខាង​លិច​​ថា វាពុំមែនជារឿងសម្ងាត់នោះទេសម្រាប់យើងដោយសារថាយុទ្ធោបករណ៍កាន់តែច្រើនបន្ថែមទៀតកំពុងត្រូវបានដឹកជញ្ជូនមកឲ្យកងកម្លាំងប្រដាប់អាវុធអ៊ុយក្រែន។