ភ្នំពេញ ៖បណ្ដុំសមាគមអង្គការសង្គមស៊ីវិល នៅថ្ងៃទី២៥ ខែឧសភា ឆ្នាំ២០២៣នេះ បានប្រកាសគាំទ្រ សេចក្ដី​សម្រេចរបស់ក្រុមប្រឹក្សាធម្មនុញ្ញដែលសម្រេចបិទផ្លូវតវ៉ាបណ្តឹងបក្សភ្លើងទៀន និងបក្សមហាសាមគ្គីជាតិខ្មែរ ក្នុងការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់​ការបោះឆ្នោតជ្រើស​តាំងតំណាងរាស្ត្រ នីតិកាលទី៧ ឆ្នាំ២០២៣នេះ បន្ទាប់ពីបក្សទាំងនេះបានអនុវត្តផ្ទុយពីច្បាប់ស្ដីពីការបោះឆ្នោត។

​តាមរយៈកិច្ចប្រជុំពេញអង្គរបស់ក្រុមប្រឹក្សាធម្មនុញ្ញនាថ្ងៃទី២៥ ខែឧសភា ឆ្នាំ២០២៣នេះ បានសម្រេចបដិសេធ​លើបណ្តឹងរបស់គណបក្ស បក្សភ្លើងទៀន និងបក្សមហាសាមគ្គីជាតិខ្មែរ ដោយសារគណបក្សទាំង​ពីរនេះបាន​អនុវត្តផ្ទុយនឹងនីតិវិធីច្បាប់ មិនបានភ្ជាប់នូវសេចក្តីប្រកាសស្តីពីការចុះបញ្ជីគណបក្សនយោបាយនៅក្រសួងមហាផ្ទៃ។

តាមរយៈសេចក្ដីសម្រេចនេះ បណ្ដុំសមាគមអង្គការសង្គមស៊ីវិល និងក្រុមយុវជនសង្គមស៊ីវិលជាច្រើន​រូបបាន​ប្រកាស​គាំទ្រ​សេចក្ដីសម្រេចនេះដោយពួកគេចាត់ទុកថា ការអនុវត្តនេះ គឺបានធ្វើទៅតាមនីតិវិធីច្បាប់នៃការបោះឆ្នោត ផ្ទុយទៅវិញគណបក្សដែលមិនបានចុះបញ្ជីឱ្យបានត្រឹមត្រូវស្របទៅតាមច្បាប់ស្ដីពីការបោះឆ្នោត គឺបានអនុវត្ត​បំពានច្បាប់ និងគោរពដល់ស្ថាប័ន គ.ជ.ប។

​ប្រធានបណ្ដាញយុវជនខ្មែរមហានគរលោក ម៉ៅ ស៊ីថា ក៏បានប្រកាសគាំទ្រសេចក្ដី​សម្រេចរបស់​ក្រុមប្រឹក្សារដ្ឋធម្មនុញ្​ញផងដែរ។ លោកបានអំពាវនាវដល់ថ្នាក់ដឹកនាំគណបក្សភ្លើងទៀន គណបក្សមហាសាមគ្គីជាតិ​ខ្មែរក៏ដូចជាថ្នាក់​ដឹកនាំគណបក្សនយោបាយផ្សេងៗទៀត គួរធ្វើនយោបាយដោយគោរពទៅតាមច្បាប់ ដើម្បីរក្សាសុខន្ដិភាព និងសណ្ដាប់ធ្នាប់ល្អនៅក្នុងប្រទេសកម្ពុជា។

​សូមជម្រាថាក្រុមប្រឹក្សាធម្មនុញ្ញតាមរយៈកិច្ចប្រជុំពេញអង្គរនាថ្ងៃទី២៥ ខែឧសភានេះ បានសម្រេចបដិសេធ​បណ្តឹង​របស់​បក្សភ្លើងទៀន និងបក្សមហាសាមគ្គីជាតិខ្មែរក្នុងការចុះបញ្ជីគណបក្សនយោបាយឈរឈ្មោះបោះឆ្នោត និងបញ្​ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣នេះបន្ទាប់ពី​បក្សទាំងពីរ​នេះបានអនុវត្តផ្ទុយពីគតិច្បាប់៕ ដោយ ៖ ដារ៉ា