ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ ក.ប.ប. នៃ ក្រសួងពាណិជ្ជកម្ម បានប្រកាសថា នឹងរៀបចំលិខិតបទដ្ឋានគតិយុត្តមួយ ដែលកំណត់អាយុ អប្បរបរមាក្នុង ការទិញគ្រឿង ស្រវឹងជាមួយក្រសួង ស្ថាប័នពាក់ព័ន្ធ ដើម្បីស្នើទៅកាន់រាជរដ្ឋាភិបាល។

ឯកឧត្តម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. នៅក្នុងសិក្ខាសាលាប ច្ចេកទេសស្តីពី “ការផ្សព្វផ្សាយលទ្ធផលនៃគម្រោងស្រាវជ្រាវ និងកិច្ចពិភាក្សាលើការកំណត់អាយុ ស្របច្បាប់អប្បរមា ដែលអាចទិញ គ្រឿងស្រវឹងបាននៅកម្ពុជា” កាលពីព្រឹកថ្ងៃទី២៥ ខែឧសភា ឆ្នាំ២០២៣នេះ បានមានប្រសាសន៍ថា បញ្ហាជាច្រើនបានលេចចេញឡើងតាមរយៈការបរិភោគគ្រឿងស្រវឹងពីសំណាក់អនីតិជន ដែលរួមមានដូចជា ការប៉ះពាល់ដល់សុខភាព និងបង្អាក់ការលូតលាស់នៃខួរក្បាលរបស់ជនដែលបរិភោគគ្រឿងស្រវឹងនោះផងដែរ។

ឯកឧត្តមបានបន្តថា ដោយសារតែផលប៉ះពាល់យ៉ាងច្រើនខាងលើ បទប្បញ្ញត្តិដែលកម្រិតអំពី អាយុស្របច្បាប់នៃការ អាចទិញគ្រឿងស្រវឹង ជាតម្រូវការដ៏ចាំបាច់ក្នុងការការពារដល់យុវជនដែលជាទំពាំងស្នងឬស្សី ព្រមទាំងរក្សានូវនិរន្ត ភាពនៃការពង្រឹងការអភិវឌ្ឍន៍ធនធានមនុស្សរបស់ជាតិផងដែរ។ ការកំណត់កម្រិតអាយុក្នុងការទិញគ្រឿងស្រវឹង នឹងក្លាយទៅជាបទប្បញ្ញត្តិយ៉ាងសំខាន់ដែលផ្តល់នូវការការពារជូនដល់ទំពាំងស្នងឬស្សីពីការលក់ និងការផ្សព្វផ្សាយ ពាណិជ្ជកម្មគ្រឿងស្រវឹង។ ឯកឧត្តមបន្ថែមទៀតថា បទប្បញ្ញត្តិនេះ នឹងដើរតួជាឧបករណ៍ មួយដែលអាចកាត់បន្ថយ នឹងទប់ស្កាត់អនីតិជនពីការបរិភោគគ្រឿងស្រវឹង ព្រមទាំងធានាឱ្យបានថាអនីតិជន នឹងមិនត្រូវបានផ្តល់សេវាកម្ម ទាក់ទិននឹងគ្រឿងស្រវឹង ក៏ដូចជាការផ្សាយពាណិជ្ជកម្មទាក់ទាញឱ្យមានការប្រើប្រាស់ នូវគ្រឿងស្រវឹងក្នុង វ័យមួយដែលមិនទាន់ស្របច្បាប់។”

សូមជម្រាបជូនថា សិក្ខាសាលាបច្ចេកទេសស្តីពី “ការផ្សព្វផ្សាយលទ្ធផលនៃគម្រោងស្រាវជ្រាវ និងកិច្ចពិភាក្សាលើការ កំណត់អាយុស្របច្បាប់អប្បរមាដែលអាចទិញគ្រឿងស្រវឹងបាននៅកម្ពុជា”នេះ ត្រូវបានប្រារព្ធឡើង ដើម្បីផ្សព្វផ្សាយនូវ លទ្ធផលនៃការស្រាវជ្រាវលើការកំណត់អាយុស្រប ច្បាប់អប្បរមាដែលអាចទិញគ្រឿងបានក្នុងព្រះរាជាណាចក្រ ដែលការស្រាវជ្រាវ នេះត្រូវបានធ្វើ ឡើងដោយ វិទ្យាស្ថានចក្ខុវិស័យអាស៊ី (AVI) សហការជាមួយស្ថាប័ន MM4A ព្រមទាំងមានការចូលរួមពីសំណាក់ តំណាងក្រសួង-ស្ថាប័នពាក់ព័ន្ធ តំណាងស្ថានទូត តំណាងអង្គការជាតិ-អន្តរជាតិ ព្រមទាំងតំណាងរបស់វិស័យ ឯកជនប្រមាណ ១០០នាក់។សិក្ខាសាលានេះដែរ បានដើរតួជាវេទិកាមួយ ក្នុងការបង្កើតការសន្ទនារ វាងភាគីពាក់ព័ន្ធនានា ទាក់ទងនឹងការរៀបចំលិខិត បទដ្ឋានគតិយុត្តដែលកម្រិត អាយុសមស្របមួយ ក្នុងការទិញគ្រឿងស្រវឹងក្នុងប្រទេសកម្ពុជា និងដើម្បីកំណត់វិធីសាស្រ្តសក្តានុពល ដើម្បីការពារយុវជនមិន ទាន់គ្រប់អាយុពីការទិញគ្រឿងស្រវឹង ក្នុងខណៈពេលដែលច្បាប់ស្តីពីការគ្រប់គ្រងគ្រឿង ស្រវឹងមិនទាន់ត្រូវបានអនុម័ត និងអនុវត្តជាផ្លូវការនៅឡើយ៕