អន្តរជាតិ ៖ អង្គការសហប្រជាជាតិ បាននិយាយកាលពីថ្ងៃសុក្រថា កិច្ចព្រមព្រៀងមួយអនុញ្ញាតឲ្យមានការនាំ​ចេញ​គ្រាប់ធញ្ញជាតិនិងជីក្នុងពេលសង្គ្រាមប្រកបដោយសុវត្ថិភាព ពីកំពង់ផែសមុទ្រខ្មៅអ៊ុយក្រែនពុំទាន់​បានបន្តប្រតិបត្តិការ​ពេញលេញនៅឡើយ បន្ទាប់ពីបានផ្អាកដំណើរការ នៅមុនការសម្រេចចិត្តរបស់រុស្ស៊ីកាល​ពីសប្តាហ៍មុនដើម្បីបន្ថែម​ពេលកិច្ចព្រមព្រៀងនេះ។

អង្គការសហប្រជាជាតិ បាននិយាយថា កិច្ចព្រមព្រៀងដែលគេហៅថា គំនិតផ្តួចផ្តើមគ្រាប់ធញ្ញជាតិនៅសមុទ្រខ្មៅ សម្របសម្រួលដោយអង្គការសហប្រជាជាតិនិងប្រទេសទួរគីកាលពីខែកក្កដាកន្លងទៅជាមួយ រុស្ស៊ី និងអ៊ុយក្រែន ដើម្បីព្យាយាមបន្ធូរបន្ថយវិបត្តិស្បៀងអាហារសកល ដែលបានធ្លាក់ចុះធ្ងន់ធ្ងរដោយការវាយលុករបស់ទីក្រុង​មូស្គូលើ​អ៊ុយក្រែនគ្របដណ្តប់លើកំពង់ផែចំនួន៣ ប៉ុន្តែគ្មាននាវាណាមួយត្រូវបានអនុញ្ញាតឲ្យធ្វើដំណើរទៅកាន់កំពង់ផែ Pivdennyi ឡើយចាប់តាំងពីថ្ងៃទី២៩ ខែមេសា។

អង្គការសហប្រជាជាតិ បាននិយាយនៅក្នុងសេចក្តីថ្លែងការថា អង្គការពិភពលោកមួយនេះ និងប្រទេសទួរគី កំពុងធ្វើការយ៉ាងជិតស្និទ្ធជាមួយភាគីទាំងអស់ក្នុងគោលបំណងបន្តប្រតិបត្តិការពេញលេញ និងដកចេញនូវឧបសគ្គ ដែលរារាំងប្រតិបត្តិការនិងកម្រិតទំហំនៃគំនិតផ្តួចផ្តើមនេះ។

ប្រទេសអ៊ុយក្រែន បានចោទប្រកាន់រុស្ស៊ីកាលពីថ្ងៃអង្គារពីការកាត់ផ្តាច់កំពង់ផែ Pivdennyi ទាំងស្រុងចេញពី​កិច្ចព្រម​ព្រៀង​សមុទ្រខ្មៅ ខណៈរុស្ស៊ី បានត្អូញត្អែថា ខ្លួនមិនអាចនំាចេញសារធាតុអាម៉ូញាក់តាមរយៈបំពង់បង្ហូរទៅកាន់កំពង់ផែ Pivdennyi នៅក្រោមកិច្ចព្រមព្រៀងនេះបាននោះទេ។

អង្គការសហប្រជាជាតិ និយាយកាលពីថ្ងៃសុក្រថា កិច្ចព្រមព្រៀងសមុទ្រខ្មៅ បានផ្តល់ឱកាសសម្រាប់ការនាំចេញជី រួមទាំងសារធាតុអាម៉ូញាក់ ប៉ុន្តែពុំមានការនាំចេញបែបនោះទេរហូតមកដល់ពេលនេះ។