ក្រុមបាតុករអាកាសធាតុជាង១.៥០០នាក់ត្រូវបាននគរបាលហូឡង់ចាប់ខ្លួន បន្ទាប់ពីបានបិទផ្លូវធំមួយក្នុងទីក្រុងឡាអេ។ ក្នុងអំឡុងពេលនៃការតវ៉ាដែលរៀបចំ ដោយសកម្មជន Extinction Rebellion បានដើរលើផ្លូវ A12 ទាមទារឲ្យបញ្ចប់ការឧបត្ថម្ភធនឥន្ធនៈហ្វូស៊ីល។

នគរបាលបានប្រើកាណុងបាញ់ទឹក ដើម្បីព្យាយាមបំបែកហ្វូងមនុស្ស ប៉ុន្តែមនុស្សជាច្រើន​បានត្រៀម​អាវភ្លៀង និងឈុតហែលទឹក។ បាតុករដែលត្រូវបានចាប់ខ្លួន ភាគច្រើនត្រូវ​បានដោះលែង ប៉ុន្តែនគរបាលបាននិយាយថា ៤០នាក់នឹងត្រូវកាត់ទោស។

ភ្នាក់ងារព័ត៌មានហូឡង់ ANP បាននិយាយថា ក្នុងចំណោមអ្នកតវ៉ាកាលពីថ្ងៃសៅរ៍ មានតារាហូឡង់ជាច្រើននាក់ រួមទាំងតារាសម្ដែងនាង Carice van Houten ដែលគេស្គាល់ថា សម្ដែងជាតួអង្គ Melisandre ក្នុងរឿងភាគទូរទស្សន៍ Game of Thrones។ នាងត្រូវបានចាប់ខ្លួន ប៉ុន្តែក្រោយមកត្រូវបានអនុញ្ញាតឲ្យត្រឡប់ទៅផ្ទះវិញ។

ក្រុមចលនា Extinction Rebellion បានចោទប្រកាន់នគរបាលថា បានប្រើកាណុងបាញ់ទឹក បង្ក្រាប​ក្រុមបាតុករ មានរយៈពេលត្រឹមតែ១៥នាទី បន្ទាប់ពីការចាប់ផ្តើមការរារាំង​ប៉ុន្តែនគរបាល​បាននិយាយថា ពួកគេបានសុំឲ្យក្រុមសកម្មជនចាកចេញ និងទុកឱកាសឲ្យពួកគេបំបែក មុនពេលប្រើកាណុងបាញ់ទឹក។ មនុស្ស ១.៥៧៩ នាក់ ដែលបដិសេធមិនព្រមចាកចេញ​ត្រូវបានចាប់ខ្លួន ៕