ភ្នំពេញ៖ ដូចដែលយើងដឹងហើយថា ក្នុងរយៈកាល ៣ឆ្នាំកន្លងមកនេះ ជំងឺកូវីដ១៩ បានធ្វើឲ្យប៉ះពាល់យ៉ាងខ្លាំងដល់ការសិក្សារបស់សិស្ស និស្សិតនៅទូទាំងសាកលលោកនិយាយជារួម នៅកម្ពុជានិយាយដោយឡែក។ ប៉ុន្តែកូវីដ ក៏បាននាំមកវិញនៅចំណុចល្អមួយចំនួនដែរ នោះគឺការជម្រុញដោយបង្ខំឲ្យមានការប្រើប្រាស់នៅបច្ចេកវិទ្យានៅក្នុងការអប់រំ ដូចជាការរៀនតាមអនឡាញ ការប្រើប្រាស់នូវបច្ចេកវិទ្យាបញ្ញាសិប្បនិម្មិត ដើម្បីជាជំនួយដល់សិស្សក្នុងការរៀននៅពេលនៅម្នាក់ឯង និងការរៀនដោយមានស័្វយភាព។

ចំណុចចុងក្រោយនេះហើយ ដែលជាកត្តាបឋម និងចំបងក្នុងការលើកកម្ពស់នូវគោលការណ៍ ការសិក្សាពេញមួយជីវិតដែលរាជរដ្ឋាភិបាលកម្ពុជា ក៏ដូចជាក្រសួងអប់រំ យុវជន និងកីឡា កំពុងបាននឹងបន្តលើកទឹកចិត្តដល់សាធារណៈជនទូទៅ។

នៅក្នុងបរិបទនេះ កាលពីចុងសប្តាហ៍កន្លងទៅ សាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា (ខេមតិច) និងសមាគមការអប់រំប្រៀបធៀបនៅកម្ពុជា (Comparative Education Society of Cambodia) បានរៀបចំសន្និសីទការអប់រំប្រៀបធៀបនៅកម្ពុជាលើកទី៣ ក្រោមប្រធានបទស្តីពី De-schooling for Post-COVID 19 Recovery នៅបរិវេណសាកលវិទ្យាល័យខេមតិច។

កិច្ចពិភាក្សាចំបងនៅក្នុងសន្និសីទនេះ គឺផ្តោតសំខាន់លើការប្រើប្រាស់បច្ចេកវិទ្យាអប់រំ ដើម្បីជំរុញ​ការ​រៀន​ដោយស័្វយភាពផ្ទាល់ខ្លួនសម្រាប់សិស្ស និស្សិត និងបុគ្គលទូទៅ ក្នុងគោលបំណងបន្ត​អភិវឌ្ឍន៍​មូលធនមនុស្ស និងសំដៅគាំទ្រការស្តារឡើងវិញ​នូវ​សេដ្ឋកិច្ចក្រោយ​ជំងឺកូវីដ១៩ និងក្នុងការត្រួសត្រាយផ្លូវសម្រាប់ការអភិវឌ្ឍន៍ប្រកបដោយចីរភាព។

ក្រៅពីនេះ នៅក្នុងសនិ្នសីទទាំងមូល ក៏មានការជជែកវែកញែកអំពីផលជះ និងក្រមសីលធម៌ នៃការ​ប្រើប្រាស់​បញ្ញាសិប្បនិម្មិត សម្រាប់ការរៀន និងការបង្រៀន ដោយមានការលើកឡើង​នូវទស្សនៈវិជ្ជារបស់ អារីស្តូត ខុងជឺ និងព្រះពុទ្ធ ។

គួររំលឹកឡើងដែលថាសន្និសីទនេះមានគោលដៅធំមួយទៀតនោះគឺ ដើរតួជាវេទិកាសម្រាប់ អ្នកស្រាវជ្រាវ សាស្ត្រាចារ្យ បញ្ញាវន្ត និងសិស្ស និស្សិតមានឱកាសបានធ្វើបទបង្ហាញនូវស្នាដៃស្រាវជ្រាវថ្មីៗ និងចុងក្រោយរបស់ខ្លួនទៅដល់អ្នកឯកទេសផ្សេងទៀត ក្នុងលក្ខណៈជាប្រធានបទនៃការជជែកពិភាក្សាដេញដោលក្នុងន័យស្ថាបនា និងប្រមូលធាតុចូល​ដើម្បីធ្វើឲ្យប្រសើរឡើងនូវអត្ថបទស្រាវជ្រាវ ក៏ដូចវិធីសាស្រ្តនៃការស្រាវជ្រាវ ។

ជាចុងក្រោយ ក្នុងនាមជាសាកលវិទ្យាល័យដែលផ្តោតចំបងលើការស្រាវជ្រាវអនុវត្ត និងនវានុវត្តន៍ ក៏ដូចជាលើកកម្ពស់ស្នាដៃ និងវប្បធម៌ស្រាវជ្រាវនៅកម្ពុជា ខេមតិចក៏បានធ្វើសេចក្តីប្រកាស​ព័ត៌មាន​ស្វែងរកអ្នកស្រាវជ្រាវ និងសាស្ត្រាចារ្យ ​ដើម្បីចងក្រងជាសៀវភៅ (Call for Book Chapter Contribution) ​ដែលមានចំណងជើងថា ​វិទ្យាសាស្រ្ត បច្ចេកវិទ្យា និងនិរន្តរភាពនៅក្នុងកិច្ច​សហប្រតិបត្តិការមេគង្គ-ឡានឆាង៕