កំពត៖ ខេត្តកំពត និងខេត្តកែប បានសម្ពោធដាក់ឲ្យប្រើប្រាស់នូវទីលានទុកដាក់សំរាមថ្មី ដែលអាចប្រើប្រាស់បានក្នុងរយៈពេល២០ឆ្នាំ និងធ្វើឲ្យខេត្តទាំង២មានភាពល្អប្រសើរថែមទៀត លើបញ្ហាបរិស្ថាន អនាម័យ ទេសចរណ៍ និងលើកកម្ពស់​សុខុមាលភាព​ប្រជាពលរដ្ឋ។

គម្រោងអភិវឌ្ឍន៍ទីក្រុងរបៀង និងគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍ សម្រាប់​កំណើន​ប្រកបដោយបរិយាប័ន្ន ក្នុងមហាអនុតំបន់មេគង្គ ជំហានទី២ ត្រូវបាន​បន្តអនុវត្តដោយ​ក្រសួងសាធារណការ ​និងដឹកជញ្ជូន ដែលគម្រោងនេះ បានផ្ដោតទៅលើការទុកដាក់សំរាម បរិស្ថាន អនាម័យ ក៏ដូចជាសោភណភាព និងសុខមាលភាពប្រជាពលរដ្ឋ។

ជាក់ស្ដែងនាព្រឹកថ្ងៃទី៣០ ខែឧសភា ឆ្នាំ២០២៣ ទីលានទុកដាក់សំរាមថ្មីចំនួន២កន្លែង សម្រាប់​ខេត្តកំពត និងខេត្តកែប ត្រូវបានសម្ពោធដាក់ឲ្យប្រើប្រាស់ ​ក្រោមអធិបតីភាព ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ឯកឧត្តមទេសរដ្ឋមន្ត្រី ស៊ុន ចាន់ថុល បានមានប្រសាសន៍លើកឡើងពី​សមិទ្ធផល​នានា​ដែលកម្ពុជា​កំពុងមាន ក៏ដូចជាកំពុងសាងសង់​ និងត្រៀមសាងសង់បន្ថែមទៀត ក្នុងនោះឯកឧត្ដម​បាន​បង្ហាញ​ពី​គម្រោងព្រែកជីកហ្វូណនតេជោ ដែលជាគម្រោងប្រវត្តិសាស្ត្រ​ ដែលនឹងធ្វើឲ្យខេត្តកំពត ​និងកែប ទទួល​បានផលប្រយោជន៍កាន់តែច្រើន ​ពិសេសគឺកម្ពុជាទាំងមូល។

ជាមួយគ្នានេះការទុកដាក់សំរាមក៏ជាផ្នែកមួយដែលត្រូវបាន​រាជរដ្ឋាភិបាលគិតគូយ៉ាងល្អិតល្អន់​ផងដែរ ​ដើម្បីលើកកម្ពស់បរិស្ថាន អនាម័យ សោភ័ណភាព​នៅតំបន់ពាក់ព័ន្ធ ពិសេសគឺគិតគូរ​ពី​សុខុមាលភាព​របស់ប្រជាពលរដ្ឋ សម្រាប់ពេលអនាគតដែលនឹងមានការអភិវឌ្ឍ​ឥតឈប់ឈរនោះ។

សម្រាប់ខេត្តកំពតទីលានទុកដាក់សំរាមថ្មីជាគម្រោងអភិវឌ្ឍន៍ទីក្រុងរបៀងនៃមហាអនុតំបន់ទន្លេមេគង្គ ជំហានទី២ ក្រោមកម្ចីឥណទានពីធនាគារអភិវឌ្ឍន៍អាស៊ី ដែលមានតម្លៃជាង៣លាន ៣៧ម៉ឺនដុល្លារអាមេរិក ស្ថិតនៅភូមិថ្មី ឃុំថ្មី ស្រុកទឹកឈូ ខេត្តកំពត។

កន្លែងទុកដាក់សំរាមនេះត្រូវបានរចនាឡើងជាពីររណ្តៅ ដែលមានទំហំមាត់រណ្ដៅប៉ុនគ្នា ៨០ម៉ែត្រ x ១៧០ម៉ែត្រ ជម្រៅ ៣ម៉ែត្រ ទំហំជាងមួយហិកតា។

តាមផែនការរណ្តៅទាំងពីរនេះនឹងត្រូវបំពេញសំរាមរហូតដល់ ១០ម៉ែត្រ គិតចាប់ពីមាត់រណ្ដៅ ដែល​អាចផ្ទុកបានបរិមាណសំរាមបានប្រមាណជាង​ ៣៤ម៉ឺនម៉ែត្រគូប ​ដែលសាងសង់លើផ្ទៃដី ជាង ៨ហិកតា លើផ្ទៃដីសរុបទំហំជាង ១០ហិកតា ​នឹងប្រើប្រាស់ក្នុងរយៈពេល២០ឆ្នាំ សម្រាប់ប្រជាជន​ក្នុងខេត្តកំពតទាំងមូលប្រមាណជា ៥ម៉ឺន ២ពាន់នាក់។

សម្រាប់ខេត្តកែបទីលានទុកដាក់សំរាមថ្មី ជាគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍ សម្រាប់​កំណើនប្រកបដោយបរិយាប័ន្នក្នុងមហាអនុតំបន់មេគង្គ ជំហានទី២ ដែលប្រើថវិកាជាង ១០លានដុល្លារអាមេរិក ​ស្ថិតនៅភូមិដំណាក់ចង្អើរ ឃុំព្រៃធំ ក្រុងកែប ខេត្តកែប។

ទីលានទុកគេសំរាមថ្មីនេះ​ ត្រូវបានសាងសង់ឡើងមានចំនួន ៤រណ្ដៅ មានសមត្ថភាពផ្ទុកសំរាម​បានប្រមាណ ៦០ម៉ឺនម៉ែត្រគូប ​និងអាចប្រើបានរយៈពេល ២០ឆ្នាំ​ និងបានសាងសង់លើផ្ទៃដីទំហំ ១៤ហិកតា​ សម្រាប់បម្រើសេចក្តីត្រូវការរបស់ប្រជាពលរដ្ឋក្នុងក្រុងកែប និងស្ទើរតែទាំងអស់​នៃ​វិស័យទេសចរណ៍ដូចជាភោជនីយដ្ឋាន សណ្ឋាគារ ផ្ទះសំណាក់ ​និងផ្សារ ដែលទទួលបាន​សេវានេះ៕អត្ថបទ ៖ ប្រាក់ វ៉ាន់ដា