អតីតនាយករដ្ឋមន្ត្រីអង់គ្លេសលោក បូរីស ចនសុន បានរត់ហាត់ប្រាណពេលព្រឹកព្រលឹមជាមួយសត្វសុខនរបស់លោកនៅថ្ងៃអង្គារ (៣០ ឧសភា)នេះ ខណៈថ្ងៃផុតកំណត់ខិតជិតដល់ សម្រាប់រូបលោកក្នុងការប្រគល់សារពីបណ្ដាញសង្គម WhatsApp និងកំណត់ហេតុប្រចាំថ្ងៃឲ្យទៅក្រុមស៊ើបអង្កេតលើបញ្ហាកូវីដ-១៩ ជាសាធារណៈ។

រដ្ឋាភិបាលអង់គ្លេសត្រូវបានជាប់គាំងក្នុងការប្រឈមមុខនឹងការស៊ើបអង្កេតជាផ្លូវការដែលកំពុងពិនិត្យមើលការដោះស្រាយវិបត្តិកូវីដ-១៩ ខណៈទីស្ដីការគណៈរដ្ឋមន្រ្តីកាលពីថ្ងៃចន្ទ (២៩ ឧសភា) បានបដិសេធមិនប្រគល់សារដែលពុំមានការកែសម្រួលពីលោក ចនសុន ក្នុងអំឡុងដែលលោកកាន់តំណែងជានាយករដ្ឋមន្ត្រី។

អតីតនាយករដ្ឋមន្ត្រីរូបនេះស្ថិតក្នុងចំណោមអ្នកដែលនឹងផ្តល់ភស្តុតាងដល់ការស៊ើបអង្កេត ដែលនឹងត្រូវចាប់ផ្តើមសវនាការក្នុងរយៈពេលពីរសប្តាហ៍។ ទីស្ដីការគណៈរដ្ឋមន្រ្តីបានផ្តល់សារពីបណ្ដាញសង្គម WhatsApp របស់លោក ចន សុន ដល់ក្រុមអ្នកស៊ើបអង្កេត ប៉ុន្តែមានផ្នែកជាច្រើននៃសារនោះ ត្រូវបានលុបចោល ឬកែប្រែឡើងវិញ។

លោក ចនសុន ធ្លាប់ត្រូវបាននគរបាលផាកពិន័យ ចំពោះការចូលរួមក្នុងព្រឹត្តិការណ៍មួយដើម្បីអបអរខួបកំណើតរបស់លោកនៅវិមាននាយករដ្ឋមន្ត្រី Downing Street កាលខែមិថុនា ឆ្នាំ ២០២០ ដែលធ្វើឱ្យលោកក្លាយជានាយករដ្ឋមន្ត្រីដំបូងគេដែលត្រូវបានរកឃើញថាបានបំពានច្បាប់នៅពេលកំពុងកាន់តំណែង។ ការផាកពិន័យទាំងនោះបានរួមចំណែកដល់ការបណ្តេញលោកចេញពីតំណែងនាយករដ្ឋមន្ត្រីកាលពីឆ្នាំមុន៕