​យុវតី​វ័យ ១៦ឆ្នាំ​ម្នាក់ ​ត្រូវបាន​ចាក់​យ៉ាង​កំរោល និង​បណ្ដាល​ឲ្យ​ស្លាប់​ភ្លាមៗ​នៅតាម​ផ្លូវ​សាធារណៈ​ដ៏​មមាញឹក​មួយ​ក្នុង​រដ្ឋធានី​នៃ​ប្រទេស​ឥណ្ឌា​កាលពី​ថ្ងៃអាទិត្យ ដែល​បង្កឱ្យមាន​ការផ្ទុះ​កំហឹង​ជាថ្មី​ចំពោះ​សុវត្ថិភាព​របស់​ស្ត្រី​នៅក្នុង​ប្រទេស​នេះ និង​អំពើ​ហឹ​ង្សា​ដែល​ប្រព្រឹត្តឡើង​ដោយ​បុរស​។​

​សាកសព​ជនរងគ្រោះ ដែល​មិន​ត្រូវបាន​គេ​កំណត់​អត្តសញ្ញាណ ត្រូវបាន​គេ​រកឃើញ​កាលពី​ល្ងាច​ថ្ងៃអាទិត្យ នៅក្នុង​តំបន់ Shahbad Dairy នៃ​សង្កាត់ Rohini ក្នុង​តំបន់​រដ្ឋបាល Delhi ខាងជើង ជាទី​ដែល​ឧប្បត្តិហេតុ​បានកើត​ឡើង​។​

​កាលពី​រសៀល​ថ្ងៃ​ច័ន្ទ នគរបាល​ឥណ្ឌា​ បាន​និយាយថា ពួកគេ​បាន​ចាប់ខ្លួន​បុរស​ជនសង្ស័យ​ម្នាក់​ឈ្មោះ Sahil ពាក់ព័ន្ធ​នឹង​ករណី​ឃាតកម្ម​នេះ​។​ លោក Ravi Kumar Singh ស្នងការរង​នគរបាល​នៃ​តំបន់​Delhi​ក្រៅ បាន​ប្រាប់​អ្នកយកព័ត៌មាន​កាលពី​ថ្ងៃ​ចន្ទ​ថា ជនសង្ស័យ Sahil ដែល​ជាជាង​ជួសជុល​ម្នាក់ ត្រូវបាន​ឃុំខ្លួន​នៅ​ទីក្រុង Bulandshahr ក្នុង​រដ្ឋ Uttar Pradesh ដែល​នៅ​ជិតខាង​។​

​ឧក្រិដ្ឋកម្ម​ប្រឆាំងនឹង​ស្ត្រី​ដែល​កើតឡើង​ញឹកញាប់​នៅក្នុង​ប្រទេស​ឥណ្ឌា ក៏​ហាក់ដូចជា​កំពុង​កើនឡើង​ផងដែរ​។ យោងតាម​ទិន្នន័យ​ពី​ការិយាល័យ​កំ​ហេតុ​ឧក្រិដ្ឋកម្ម​ជាតិ​របស់​ប្រទេស​ឥណ្ឌា ករណី​ឧក្រិដ្ឋកម្ម​ប្រឆាំងនឹង​ស្ត្រី​មានការ​កើនឡើង ២០% កាល​ឆ្នាំ២០២០ បើ​ធៀប​នឹង​ឆ្នាំ ២០១៣ ដែលជា​ឆ្នាំ​ចុងក្រោយ​មុនពេល​គណបក្ស Bharatiya Janata Party (BJP) កាន់អំណាច​៕​