​រដ្ឋមន្ត្រីការបរទេស​រុស្ស៊ី​លោក Sergei Lavrov បាន​និយាយ​កាលពី​ថ្ងៃ​អង្គា​រថា លោកខាងលិច​កំពុង​គាំទ្រ​ការ​ប្រល័យពូជសាសន៍​នៅក្នុង​ប្រទេស​អ៊ុយ​ក្រែ​ន តាមរយៈ​ការគាំទ្រ​ផែនការ​សន្តិភាព​របស់​លោក​ប្រធានាធិបតី Volodymyr Zelenskiy

​ថ្លែង​ក្នុងជំនួប​ជាមួយ​រដ្ឋមន្ត្រីការបរទេស​ប៊ូ​រុន​ឌី​លោក Albert Shingiro​ក្រោយ​ធ្វើដំណើរ​មកដល់​ទីក្រុង Bujumbura លោក Lavrov​អះអាងថា ផែនការ​សន្តិភាព​អ៊ុយ​ក្រែ​ន នឹងត្រូវ​បំផ្លាញ​អ្វីៗ​គ្រប់បែបយ៉ាង​របស់​រុស្ស៊ី​នៅ​តំបន់​ភាគ​ខាងកើត​អ៊ុយ​ក្រែ​ន និង​ឧបទ្វីប​គ្រី​ម៉េ​។

​ទោះបីជា​យ៉ាងណាក៏ដោយ លោក Lavrov ពុំបាន​ផ្តល់​ភស្តុតាង ដើម្បី​គាំទ្រ​អំណះអំណាង​របស់​លោ​កឡើ​យ ។ រុស្ស៊ី បាន​ចោទប្រកាន់​ជា​យូរ​មកហើយ​ថា​លោកខាងលិច ពុំ​ខ្វាយខ្វល់​នឹង​អ្វីដែល​ពួកគេ​និយាយថា គឺជា​ការ​សង្កត់សង្កិន​របស់​អ៊ុយ​ក្រែ​ន​លើ​ពលរដ្ឋ​និយាយ​ភាសា​រុស្ស៊ី នៅ​តំបន់​ភាគ​ខាងកើត Donbas និង​កន្លែង​ផ្សេងទៀត ។

​លោក Lavrov បាន​និយាយ​នៅក្នុង​សន្និសីទ​សារព័ត៌មាន​រួមគ្នា​ជាមួយ​សម​ភាគី​ប៊ូ​រុន​ឌី​របស់លោក​ថា ការសន្និដ្ឋាន​សាមញ្ញ​ទេ គឺ​លោកខាងលិច​គាំទ្រ​ដោយផ្ទាល់​ការ​ប្រល័យពូជសាសន៍ ។ "

​សូមបញ្ជាក់ថា ផែនការ​សន្តិភាព​រប​ស់លោក Zelenskiy គឺ​ចង់​ឲ្យ​ដក​កងកម្លាំង​រុស្ស៊ី​ចេញពី​ទឹកដី​ទាំងអស់​របស់​អ៊ុយ​ក្រែ​ន​ដែល​រួមទាំង​ឧបទ្វីប​គ្រី​ម៉េ ដែល​ទីក្រុង​ម៉ូស្គូ​ដាក់បញ្ចូល​ជា​ឧបសម្ព័ន្ធ​របស់ខ្លួន​ទាំង​បង្ខំ​កាលពី​ឆ្នាំ២០១៤៕​