បណ្តាប្រទេសក្នុងសម្ព័ន្ធមិត្តយោធាណាតូ ដែលកំពុងស្ថិតនៅកណ្តាលសមយុទ្ធយោធាតំបន់អាក់ទិក បានសន្យាកាលពីថ្ងៃអង្គារថា ពួកគេនឹងការពារសមាជិកថ្មីចុងក្រោយហ្វាំងឡង់ ដែលកំពុងធ្វើម្ចាស់ផ្ទះសមយុទ្ធរួមគ្នាលើកដំបូងរបស់ណាតូ ចាប់តាំងពីបានក្លាយជាសមាជិកទី៣១ របស់សម្ព័ន្ធមិត្តលោកខាងលិចមួយនេះ កាលពីខែមេសា។
ការបន្ថែមហ្វាំងឡង់ នឹងបង្កើនទ្វេដងកម្លាំងតាមព្រំដែនអង្គការណាតូមានរួមគ្នាជាមួយរុស្ស៊ី ដែលបានបើកការវាយលុកទ្រង់ទ្រាយធំលើប្រទេសជិតខាងមួយទៀត គឺអ៊ុយក្រែន កាលពីខែកុម្ភៈ ឆ្នាំមុន ។
កងកម្លាំងសម្ព័ន្ធមិត្តជិត ១ពាន់នាក់ មកពីសហរដ្ឋអាមេរិក អង់គ្លេស និងន័រវែស ហើយនិងប្រទេសជិតខាងស៊ុយអែត បានចូលរួមជាមួយទាហានហ្វាំងឡង់ប្រហែល ៦.៥០០នាក់ និងរថពាសដែក ១ពាន់គ្រឿង សម្រាប់សមយុទ្ធ Northern Forest ដែលជាសមយុទ្ធកងកម្លាំងជើងគោកនាសម័យទំនើបធំបំផុតរបស់ហ្វាំងឡង់។
ឈរមើលសមយុទ្ធនៅចម្ងាយជិះប្រហែល ២ម៉ោងពីព្រំដែនរុស្ស៊ី ត្រង់ចំណុចទីតាំងហ្វឹកហាត់ការបាញ់កាំភ្លើងធំបំផុតរបស់អឺរ៉ុប Rovajarvi ស្ថិតនៅតំបន់ភាគខាងជើងហ្វាំងឡង់ លោកឧត្តមសេនីយ៍ទោ Gregory Andersonមកពីអង្គភាពកងទ័ពភ្នំលេខ ១០នៃកងទ័ពសហរដ្ឋអាមេរិក បាននិយាយថា ប្រទេសរបស់លោកត្រៀមខ្លួនរួចរាល់ ដើម្បីការពារហ្វាំងឡង់ ។
លោក Anderson និយាយថា កងទ័ពសហរដ្ឋអាមេរិក កំពុងហ្វឹកហាត់នៅទីនេះ ជាមួយសម្ព័ន្ធមិត្តថ្មីចុងក្រោយរបស់ណាតូពួកយើង គឺដើម្បីបង្កើតសមត្ថភាពជួយការពារហ្វាំងឡើង បើសិនជាមានអ្វីកើតឡើង៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
