ភ្នំពេញ៖ ពលរដ្ឋប្រកបអាជីវកម្មមួយចំនួននៅតែបន្តយកផ្លូវសាធារណៈ ធ្វើអាជីវកម្មដើម្បីប្រយោជន៍ផ្ទាល់ខ្លួន ធ្វើឲ្យប៉ះពាល់ដល់អ្នកធ្វើដំណើរដោយថ្មើរជើង និងធ្វើឲ្យបាត់បង់បរិស្ថានអនាម័យសណ្ដាប់ធ្នាប់សាធារណៈ។

ដូច្នេះដោយអនុវត្តតាមផែនការណែនាំរបស់លោក ថេង សុថុល អភិបាលខណ្ឌ៧មករា នៅព្រឹកថ្ងៃទី០១ ខែមិថុនា ឆ្នាំ២០២៣នេះ កម្លាំងគណៈបញ្ជាការឯកភាពរដ្ឋបាលខណ្ឌ ចុះរៀបចំសណ្តាប់ធ្នាប់តាមបណ្តោយផ្លូវភ្លោះអូឬស្សី ក្នុងសង្កាត់បឹងព្រលិត ដើម្បីឲ្យមានភាពល្អបនរសើរឡើងវិញ។

ក្នុងនោះដែរ កម្លាំងគណៈបញ្ជាការខណ្ឌបានធ្វើកិច្ចសន្យាណែនាំដល់ម្ចាស់ទីតាំង លក់បាយ កាហ្វេ គុយទាវ មួយកន្លែង ស្ថិតនៅតាមបណ្តោយផ្លូវលេខ២១៤ជាប់សង្កាត់បឹងព្រលិត ដែលបានយក​ផ្លូវសាធារណៈមកប្រកបអាជីវកម្មផ្ទាល់ខ្លួន រួមទាំងចតឡាន​ ម៉ូតូនៅលើទ្រូវផ្លូវ ចិញ្ចើម​ផ្លូវ បង្កអោយផ្លូវរួមតូចពិបាកធ្វើដំណើរ និងអាចបង្កគ្រោះថ្នាក់ចរាចរជាយថាហេតុ ។

ជាមួយគ្នានេះ រដ្ឋបាលខណ្ឌ៧មករា សូមណែនាំដល់ប្រជាពលរដ្ឋដែលប្រកបរបរលក់ដូរតាម​បណ្តា​ផ្លូវនានា ក្នុងភូមិសាស្ត្រខណ្ឌ ត្រូវចូលរួមទាំងអស់គ្នា បញ្ឈប់ការយកចិញ្ចើមផ្លូវសាធារណៈដាក់តាំង​លក់ប្រកបរបរអាជីវកម្ម ​ដើម្បីចូលរួមថែរក្សា​សោភ័ណភាព​ សុវត្ថិភាព របៀបរៀបរយក្នុងមូលដ្ឋាន​ខណ្ឌ នៃរាជធានីភ្នំពេញ។

កម្លាំងសណ្តាប់ធ្នាប់ខណ្ឌ៧មករា បានស្នើដល់ប្រជាពលរដ្ឋ អាជីវករ បន្តចូលរួមសហការជាមួយ​អាជ្ញាធរ ក្នុងការទុកដាក់ទំនិញ ​ឬសម្ភារៈលក់ដូរ តាមមុខផ្ទះ ​ធ្វើមិចកុំឱ្យ​ហូរហៀរ​មក​លើទ្រូវផ្លូវ ដែលបង្កឱ្យបាត់សណ្តាប់ធ្នាប់ ​បាត់ផ្លូវសម្រាប់អ្នកថ្មើរជើង ​នាំឱ្យបង្កជាគ្រោះថ្នាក់ជាយថាហេតុ៕ អត្ថបទ៖ កុម្ភៈ