ឧត្តរមានជ័យ៖ នៅថ្ងៃទី១មិថុនាឆ្នាំ២០២៣ មន្ទីរធនធានទឹក និងឧតុនិយមខេត្តឧត្តរមានជ័យ ចាប់ផ្តើមរក្សាប្រភពទឹកទុក នៅតាមអាងស្តុបទឹកនានាមួយចំនួន ដើម្បីផ្គត់ផ្គង់ទឹកសម្រាប់ប្រជាកសិករធ្វើស្រែ ចំការ និងបង្ការការខ្វះខាតប្រភពទឹក។

លោក ញឺន កួន ប្រធានមន្ទីរធនធានទឹក និងឧតុនិយមខេត្តឧត្តរមានជ័យ បានឲ្យដឹងថា ដោយ​សារស្ថានភាពអាកាសធាតុមានការប្រែប្រួលមិនទាងទាត់ធ្វើឲ្យបរិមាណទឹកភ្លៀងមានភ្លៀងធ្លាក់មិនទាងទាត់ផងដែរនោះ មន្រ្តីយើងបានរក្សាប្រភពទឹកនៅតាមបណ្តាលអាងស្តុបទឹកនានា ដើម្បីទុកប្រភពទឹកផ្គត់ផ្គង់សម្រាប់ប្រជាពលរដ្ឋធ្វើការ​ស្រោចស្រព​ដំណាំ​ ស្រែចំការ ខណៈកូនរដូវប្រាំង និងបានមកដល់នៅពេលខាងមុខ ។

លោកប្រធាន បានបន្តទៀតថា បច្ចុប្បន្ននេះ នៅតាមបណ្តាលអាងស្តុបទឹកតូចធំនានា ទាំង៨២​អាងស្តុបទឹក ក្នុងភូមិសាស្រ្តខេត្តឧត្តរមានជ័យ អាចមានបរិមាណទឹកប្រើប្រាស់​ផ្គត់ផ្គង់​បាន​គ្រប់គ្រាន់​សម្រាប់​ជួយដល់កសិករធ្វើស្រែ ​បានជាង៤ម៉ឺន​ហិកតា​សម្រាប់កូនរដូវប្រាំង។ប៉ុន្តែទោះបីជានៅក្នុងអាងស្តុបប្រភពទឹក មានបរិមាណទឹកគ្រប់គ្រាន់យ៉ាងណាក្តី​ ក៏​មន្រ្តីយើង​នៅតែមាន​ការប្រុងប្រយ័ត្នទុកជាប់ជានិច្ច ​ដើម្បីរក្សា​ប្រភព​ទឹក​ទុកដល់ការ​ស្រោចស្រព​​ផលដំណាំ កសិកម្ម ស្រូវ នៅកូនរដូវប្រាំងរបស់បងប្អូនកុំឲ្យមានការខ្វះខាតផងដែរ។

លោក បន្ដថា ក្នុងនោះ យើង​អាច​ជួយ​ផ្គត់ផ្គង់​ប្រភព​ទឹកជួយដល់ខេត្ត​ជាប់​ព្រំប្រទល់​ស្រុកមួយចំនួន​រួមមាន៖ ស្រុកស្រីស្នំ ​ស្រុកក្រឡាញ់ ខេត្តសៀមរាប និងស្រុកថ្មពួក​ ភ្នំស្រុក ខេត្តបន្ទាយមានជ័យ ផងដែរ៕