ភ្នំពេញ៖ កុមារអាយុចាប់ពី ៥ឆ្នាំ ដល់ក្រោម១៨ឆ្នាំ នៅក្នុងរាជធានីភ្នំពេញ និងមកពីបណ្ដាខេត្តនានា ប្រមាណជាង ១០០នាក់ ចូលរួមប្រកួតគូរគំនូរលើកទី៦ ដើម្បី​អប​អរសាទ​ទិវាកុមារ​អន្តរជាតិ ១មិថុនា ក្រោមការរៀបចំរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា និងសហការជាមួយវិទ្យាស្ថានសិល្បៈអន្តរជាតិ ។

ក្នុងពិធីប្រគូរគំនូរនៅថ្ងៃទី១ ខែមិថុនា ឆ្នាំ២០២៣ នាមជ្ឈមណ្ឌលកម្សាន្តកោះពេជ្រ លោកជំទាវ សន សាបោន អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាជាតិ​ ដើម្បីកុមារ មានប្រសាសន៍ថា ​ក្រៅពីអបអរទិវាកុមារអន្តរជាតិ​ ការប្រកួតនេះ ក៏ដើម្បីឲ្យកុមារបាន​បង្ហាញនូវស្នាដៃ ទេពកោសល្យ និងសមត្ថភាពរបស់ពួកគេ ពាក់ព័ន្ធនឹងការគូរគំនូរ ហើយក៏ជាការផ្ដល់ឱកាសដល់កុមារបានសប្បាយរីករាយ ក្នុងទិវាកុមារអន្តរជាតិនេះ ។

លោកជំទាវ បានបន្តថា ពាក់ព័ន្ធនឹងការរៀបចំនេះ គឺក្រសួងបានប្រកាសជាសាធារណៈ ដើម្បី​ឲ្យកុមារគ្រប់​មជ្ឈដ្ឋាន​ ទាំងសាលារដ្ឋ ​និងសាលាឯកជនបានដាក់ពាក្យចូលប្រកួត ​ហើយនៅឆ្នាំនេះ មានកុមារចំនួន ​១២៦នាក់ បានចូលរួម ។

លោកជំទាវ សន សាបោន បានបន្ថែមថា ចំពោះការប្រកួតនេះ ​ចែកចេញជា៣ក្រុម គឺក្រុមទី១. អាយុ៥ឆ្នាំ ដល់៨ឆ្នាំ គូរគំនូរពាក់ព័ន្ធជីវជាតិនៅលើផែនដី, ក្រុមទី២. អាយុពី៩ឆ្នាំ ដល់១៣ឆ្នាំ គូរគំនូរពាក់ព័ន្ធនឹងជីវិតនៅក្នុងទឹក និងក្រុមទី៣. អាយុចាប់ពី១៤ឆ្នាំ ​ដល់ក្រោម១៨ឆ្នាំ គូរគំនូរ​ពាក់ព័ន្ធប្រធានបទខួបលើកទី៧៤ ទិវាកុមារអន្តជាតិ ​និងទិវាកុមារកម្ពុជា ឆ្នាំ២០២៣ ក្រោមប្រធានបទ “យើងរួមគ្នាថែរក្សាការពារ ​និងអភិវឌ្ឍន៍កុមារគ្រប់រូប ក្រោមម្លប់សន្តិភាព​ក្នុងយុគសម័យឌីជីថល” ។

លោកជំទាវ អគ្គលេខាធិការរង បានបញ្ជាក់ថា ការប្រកួតគូរគំនូរនេះ ​កុមារជាប់ជ័យលាភីលេខ១ ទទួលបានមេដាយមាស, លេខ២ បានមេដាយប្រាក់ និងលេខ៣ ទទួលបានមេដាយសំរឹទ្ធ ដោយពួកគេនឹងទទួល​បានថវិកា​មួយចំនួនផងដែរ ​ខណៈកុមារមិនបានជាប់ជ័យលាភី ក៏បាន​ទទួលបានកាដូលើកទឹកចិត្តផងដែរ ៕អត្ថបទ៖ បាន សុខរិទ្ធិ