ភ្នំពេញ៖ សម្ដេចកិត្តិសង្គហបណ្ឌិត ម៉ែន សំអន បានថ្លែងថា កម្ពុជាបានបង្កើតច្បាប់ និងដាក់ចេញនូវ​វិធាន​ការនានា ដើម្បីការពារកុមារ រួមទាំងផ្ដល់នូវការយកចិត្តទុកដាក់ ​និងផលប្រយោជន៍ជាច្រើន​ដល់ពួកគេ​ ព្រោះនេះជាការងារអាទិភាព ហើយកុមារជាអ្នកបន្តវេនរបស់ជាតិ ។

ក្នុងឱកាសអបអរសាទរ ខួបលើកទី៧៤ ទិវាកុមារអន្តជាតិ ១មិថុនា និងទិវាកុមារកម្ពុជា​ ឆ្នាំ២០២៣ និងខួបលើកទី២១ ​ទិវាពិភពលោកប្រឆាំងពលកម្មកុមារ១២ មិថុនា នៅថ្ងៃទី១ ខែមិថុនា ឆ្នាំ២០២៣ សម្ដេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច មានប្រសាសន៍ថា រាជរដ្ឋាភិបាល បាន​ប្ដេជ្ញា​ចិត្តយ៉ាង​មោះមុត​ក្នុងការពន្លឿន ​ដំណើរការកំណែទម្រង់ច្បាប់ ​និងប្រព័ន្ធយុត្តិធម៌ឱ្យមានលក្ខណៈស្រប តាម​ស្តង់ដារជាតិ អន្តរជាតិ ពិសេសសំដៅលើកស្ទួយការគោរពសិទ្ធិជាមូលដ្ឋានរបស់កុមារ ។

សម្ដេច បានបន្តថា តាមរយៈកិច្ចខិតខំប្រឹងប្រែងនេះ កម្ពុជាសម្រេចបានការងារជាច្រើនលើវិស័យ​កុមារ រួមមាន៖ ច្បាប់ស្ដីពីយុត្តិធម៌អនីតិជន បានរៀបចំឡើងក្នុងគោលបំណងឆ្លើយតប​នឹង​ស្ថានភាពវិវឌ្ឍន៍​ជាក់ស្តែងរបស់កម្ពុជា ​ដែលតម្រូវឱ្យមានច្បាប់ពិសេស ដើម្បីកំណត់នូវ​នីតិវិធីកុមារមេត្រី ​និងអនុវត្តចំពោះអនីតិជនដែលប្រព្រឹត្តបទល្មើស ​តាមរយៈការស្តារនីតិសម្បទា សំដៅបង្វែរ ​និងសមាហរណកម្ម ទៅក្នុងសហគមន៍វិញ ប្រសើរជាងការដាក់អនីតិជនក្នុងពន្ធនាគារ ។

ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន​ និងយុវនីតិសម្បទា ​មានប្រសាសន៍ថា ទិសដៅបង្ហាញ​ពីការយកចិត្តទុកដាក់ដល់កុមា ​រាជរដ្ឋាភិបាលបានដាក់​ឱ្យអនុវត្តនូវកម្មវិធី​ឧបត្ថម្ភ​សាច់ប្រាក់​មួយចំនួន នៅក្នុងដំណាក់កាល នៃការកើតមាននូវវិបត្តិផ្សេងៗ ​ពិសេសជំងឺកូវីដ-១៩ ។

ឯកឧត្តម បានបន្តថា ក្នុងនោះកម្មវីធី​ឧបត្ថម្ភ​សាច់ប្រាក់ជូនស្ត្រីមានផ្ទៃពោះ​ និងកុមារអាយុក្រោម ២ឆ្នាំ, ​កម្មវីធីឧបត្ថម្ភសាច់ប្រាក់ជូនដល់គ្រួសារក្រីក្រ ​និង​ងាយរងគ្រោះក្នុងអំឡុងពេល​ប្រយុទ្ធ​នឹងជំងឺកូវីដ-១៩, ជំនួយសង្គមជាសាច់ប្រាក់ក្រោយពេល​បិទខ្ទប់ ​សម្រាប់​ពលរដ្ឋមានការ​លំបាក​ផ្នែកជីវភាព, កម្មវិធីជំនួយសង្គមជាសាច់ប្រាក់​ជូនគ្រួសាររងហានិភ័យ​ ដែលរងផល​ប៉ះពាល់ធ្ងន់ធរ​ពីគ្រោះទឹកជំនន់ ​និងកម្មវិធី​ឧបត្ថម្ភ​សាច់ប្រាក់ ​ជូនគ្រួសារងាយរង​ហានិភ័យ ក្នុងអំឡុងពេលមាន​សម្ពាធអតិផរណា ៕អត្ថបទ៖ បាន សុខរិទ្ធិ