ភ្នំពេញ ៖ ជប៉ុននឹងបញ្ជូនក្រុមអាជ្ញាកណ្តាលជប៉ុនប្រមាណ ៤០រូប ដើម្បីចូលរួមក្នុងព្រឹត្តិការណ៍កីឡា​អាស៊ាន​ប៉ារ៉ាហ្គេម​លើកទី១២ ឆ្នាំ ២០២៣ ដែលរៀបចំធ្វើនៅកម្ពុជា ។ នេះបើយោងតាមសេចក្ដីប្រកាសព័ត៌មានមួយចេញផ្សាយក្នុងផេកហ្វេសប៊ុកផ្លូវការស្ថានទូតជប៉ុនប្រចាំកម្ពុជានាថ្ងៃទី ១ ខែមិថុនា ឆ្នាំ ២០២៣ នេះ។

សេចក្ដីប្រកាសព័ត៌មាន ដែលស្ថានទូតជប៉ុនផ្សព្វផ្សាយមានខ្លឹមសារថា តាមរយៈកម្មវិធីរួមចំណែកជាអន្តរជាតិ «កីឡាសម្រាប់ថ្ងៃស្អែក» ដែលផ្សព្វផ្សាយដោយទីភ្នាក់ងារកីឡានៃប្រទេសជប៉ុន នឹងបញ្ជូនក្រុមអាជ្ញាកណ្តាល​ជប៉ុនប្រមាណ៤០រូប សម្រាប់ការប្រកួតកីឡា៤ប្រភេទមាន កីឡាអត្តពលិកម្ម កីឡាលើកទម្ងន់ កីឡាហែលទឹក និងកីឡាបាល់បោះជិះរទេះ ចូលរួមព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ដែលនឹងប្រព្រឹត្តិទៅចាប់ពីថ្ងៃទី៣ ដល់ទី៩ ខែមិថុនា នៅកម្ពុជា។

ចំនួនដែលនឹងត្រូវបញ្ចូន (បណ្តោះអាសន្ន) សម្រាប់កីឡាអត្តពលិកម្ម ២០រូប សម្រាប់កីឡាលើកទម្ងន់ ២រូប សម្រាប់កីឡាហែលទឹក ១២រូប និងសម្រាប់កីឡា បាល់បោះជិះរទេះ ៣រូប។ ដើមចមនៃការបញ្ជូន សម្រេចតាម​រយៈសំណើ របស់គណៈកម្មាធិការរៀបចំការ ប្រកួតកីឡាអាស៊ានប៉ារ៉ាហ្គេម​កម្ពុជាដែលគ្រប់គ្រង​ដោយ​អាស៊ានប៉ារ៉ាហ្គេម។ អាជ្ញាកណ្ដាលជាច្រើនមានបទពិសោធន៍ចូលរួមក្នុងព្រឹត្តិការណ៍កីឡាតូក្យូ២០២០។

ជុំវិញការបញ្ជូនក្រុមអាជ្ញាកណ្ដាលនេះ ត្រូវបានធ្វើឡើងក្នុងនាមជាផ្នែកមួយនៃកិច្ចខិតខំប្រឹងប្រែងផ្លាស់​ប្ដូរទំនាក់ទំនងអន្តរជាតិក្នុងឆ្នាំអបអរខូបលើកទី៥០ នៃទំនាក់ទំនងមិត្តភាព និងកិច្ចសហប្រតិបត្តិការជប៉ុន - អាស៊ាន៕ ដោយ ៖ សុជាតា