ត្បូងឃ្មុំ៖ សម្ដេចអគ្គមហាពញាចក្រី ហេង សំរិន ប្រធានរដ្ឋសភាកម្ពុជា បានជំរុញទៅកាន់វត្តអារាមនានា ដែលមានលទ្ធភាពកសាងនូវសាលាពុទ្ធិកសិក្សាបន្ថែមទៀត ដើម្បីព្រះសង្ឃ រួមទាំងពុទ្ធបរិស័ទ បានសិក្សានូវគន្ថធុរៈ (ពុទ្ធវចនៈ) និងវិបស្សនាធុរៈ ឲ្យកាន់តែល្អប្រសើរ ។

ក្នុងពិធីបញ្ចុះខណ្ឌសីមាព្រះវិហារថ្មី បុណ្យពុទ្ធាភិសេក និងសម្ពោធឆ្លងសមិទ្ធផលនានាក្នុងវត្តបុទុមព្រឹក្ស ហៅវត្តពពេល ស្ថិតក្នុងឃុំពពេល ស្រុកពញាក្រែក ខេត្តត្បូងឃ្មុំ កាលពីថ្ងៃទី៣ ខែមិថុនា ឆ្នាំ២០២៣នេះ សម្ដេចប្រធានរដ្ឋសភា មានប្រសាសន៍ថា វត្តអារាមដើរតួនាទីយ៉ាងសំខាន់ សម្រាប់សង្គមខ្មែរតាំងពីបុរាណមក ព្រោះជាកន្លែងអប់រំចិត្ត គោរពបូជាតាមផ្លូវជំនឿសាសនា និងជាថ្នាលបណ្តុះបណ្តាលនូវចំណេះដឹង ចំណេះធ្វើ និងជាកន្លែងរក្សាគម្ពីក្បួនច្បាប់ អក្សរសាស្ត្រ ទំនៀមទម្លាប់ វប្បធម៌ ប្រពៃណី តម្លៃសីលធម៌ និងធនធានមនុស្សខាងបញ្ញាស្មារតី ទាំងផ្លូវពុទ្ធចក្រ និងអាណាចក្រ ។

សម្តេចអគ្គមហាពញាចក្រី បានបន្តថា ដោយមើលឃើញពីតួនាទីដ៏សំខាន់នេះ ទើបពុទ្ធបរិស័ទនៅកម្ពុជាបានយកចិត្តទុកដាក់ខ្ពស់ ក្នុងការពង្រឹងវិស័យពុទ្ធសាសនា តាមរយៈការកសាងសមិទ្ធផលនានាក្នុងវត្តអារាម ដើម្បីទុកជាទីកន្លែងសម្រាប់បំពេញបុណ្យកុសល និងជាឃ្លាំងសម្រាប់រក្សាវប្បធម៌ប្រពៃណីខ្មែរ ។

ជាមួយនេះសម្តេច បានលើកទឹកចិត្តដល់ព្រះសង្ឃគ្រប់អង្គ អាចារ្យ គណៈកម្មការ និងពុទ្ធបរិស័ទ​ចំណុះជើងវត្តទាំងអស់ រួមគ្នាថែរក្សាការពារសមិទ្ធផលឱ្យបានគង់វង្ស ស្ថិតស្ថេរក្នុងព្រះពុទ្ធសាសនា និងសង្គមជាតិ និងសូមជំរុញឱ្យមានកិច្ចសហការគ្នារវាងព្រះសង្ឃ អាចារ្យ គណៈកម្មការ អាជ្ញាធរ​មូលដ្ឋាន និងពុទ្ធបរិស័ទ ដើម្បីបើកដំណើរការពុទ្ធិកសិក្សា សម្រាប់ព្រះសង្ឃ​បានសិក្សារៀន​សូត្រទាំងផ្នែកគន្ថធុរៈ និងវិបស្សនាធុរៈឱ្យបានល្អប្រសើរ ។

គួរបញ្ជាក់ថា ព្រះវិហារថ្មីក្នុងវត្តពពេល ដែលបានបញ្ចុះខណ្ឌសីមានេះ បានចំណាយថវិកា​ក្នុងការ​សាងសង់អស់ចំនួន ២៩ម៉ឺនដុល្លារ ជាបច្ច័យដ៏ថ្លៃថ្លារបស់សម្តេចអគ្គមហាពញាចក្រី និងសម្តេចធម្មវិសុទ្ធវង្សា សៅទី ហេង សំរិន ។

ក្នុងឱកាសនោះសម្តេចប្រធានរដ្ឋសភា ក៏បានផ្តល់ថវិកាចំនួន ១ម៉ឺនដុល្លារ សម្រាប់ចាក់បេតុង ក្នុងទីធ្លាវត្តបុទុមព្រឹក្សនេះ ទាំងមូលផងដែរ ៕ អត្ថបទ បាន សុខរិទ្ធិ