ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃកម្ពុជា បានបញ្ជា​ឱ្យក្រសួងការងារ និងបណ្ដុះបណ្ដាលវិជ្ជាជីវៈបន្តផ្សព្វផ្សាយអំពីការអនុញ្ញាត​ឱ្យបងប្អូនកម្មករ​និយោជិត បានឈប់សម្រាកពីការងារចំនួន ៣ថ្ងៃ ដោយរក្សាប្រាក់ឈ្នួល និងអត្ថប្រយោជន៍​ផ្សេងៗនៅដដែល ដើម្បីបង្កលក្ខណៈងាយស្រួលដល់កម្មករនិយោជិត ក្នុងការចូលរួមបោះឆ្នោត​ជ្រើសតាំងតំណាងរាស្ត្រសម្រាប់នីតិកាលទី៧ នៃរដ្ឋសភាដែលនឹងប្រព្រឹត្តទៅនៅថ្ងៃទី២៣ ខែកក្កដា ឆ្នាំ២០២៣ខាងមុខនេះ។

សម្ដេចតេជោ ហ៊ុន សែន នាយករដ្ឋមន្រ្ដី បានមានប្រសាសន៍បញ្ជាក់បែបនេះ ក្នុងឱកាស អញ្ជើញបន្តចុះជួបសំណេះសំណាលជាមួយកម្មករកម្មការិនីសរុបជាង ១ ម៉ឺន ៦ពាន់នាក់​នៅរោងចក្រ សហគ្រាសនានា ​នៅក្នុងស្រុកគងពិសី ខេត្តកំពង់ស្ពឺ នៅព្រឹកថ្ងៃទី៤ ខែមិថុនា ឆ្នាំ២០២៣នេះ។

យោងតាមលិខិតរបស់រាជរដ្ឋាភិបាលជម្រាបជូនទៅក្រសួងការងារ និងបណ្ដុះបណ្ដាលវិជ្ជាជីវៈ បញ្ជាក់ថា ​រាជរដ្ឋាភិបាលសម្រេចអនុញ្ញាតឱ្យមន្ត្រីរាជការ កម្មករកម្មការិនី និយោជិត ឈប់​សម្រាករយៈពេល ៣ថ្ងៃ គឺនៅថ្ងៃទី២២ ថ្ងៃទី២៣ និងថ្ងៃទី២៤ ខែកក្កដា ឆ្នាំ២០២៣ ដើម្បីទៅចូលរួម​បោះឆ្នោតជ្រើសតាំងតំណាងរាស្រ្ដ ​នាថ្ងៃទី២៣ ខែកក្កដា ឆ្នាំ២០២៣ ខាងមុខផង។

ក្រសួងការងារនៅថ្ងៃទី៣ ខែមិថុនា ឆ្នាំ២០២៣នេះ បានជូនដំណឹងដល់ម្ចាស់ឬនាយករោងចក្រ សហគ្រាសទាំងអស់ ត្រូវអនុញ្ញាតឱ្យបងប្អូនកម្មករនិយោជិតបានឈប់សម្រាកពីការងារចំនួន ៣ថ្ងៃ គឺនៅថ្ងៃ ទី២២ ថ្ងៃទី២៣ និងថ្ងៃទី២៤ ខែកក្កដា ​ឆ្នាំ២០២៣ ដោយរក្សាប្រាក់ឈ្នួល និង​អត្ថប្រយោជន៍​ផ្សេងៗ​នៅដដែល ​ដើម្បីបង្កលក្ខណៈងាយស្រួលដល់កម្មករនិយោជិតក្នុងការ​ចូលរួមបោះឆ្នោតជ្រើសតាំងតំណាងរាស្ត្រសម្រាប់នីតិកាលទី៧ ដែលនឹងប្រព្រឹត្តទៅនៅថ្ងៃអាទិត្យ ទី២៣ ខែកក្កដាខាងមុខនេះ។

ក្រសួងបញ្ជាក់ថា ដល់ម្ចាស់ ឬនាយករោងចក្រ ​សហគ្រាសទាំងអស់ថា រាល់ការឈប់សម្រាក​ដូចមាន​កំណត់ខាងលើកម្មករនិយោជិតពុំតម្រូវឱ្យបង្ហាញឯកសារពាក់ព័ន្ធផ្សេងៗ​នៅ​ពេលត្រឡប់មកវិញឡើយ។ និយោជក​ត្រូវខិតខំបើក​ប្រាក់ឈ្នួលជូនបងប្អូនកម្មករ​និយោជិតឱ្យ​បានមុនថ្ងៃទី២២ ខែកក្កដា ឆ្នាំ២០២៣។

បើពុំមានលទ្ធភាពបើកប្រាក់ឈ្នួលទាន់ពេលទេក៏ត្រូវអនុញ្ញាតឱ្យបងប្អូនកម្មករនិយោជិតខ្ចីប្រាក់​ឈ្នួលមួយភាគ (បុរេប្រទាន) ជាមុនសិន​ដើម្បីអាចមានលទ្ធភាពទៅចូលរួមបោះឆ្នោតបាន៕អត្ថបទ៖ វ៉ន ដារ៉ា