ភ្នំពេញ៖ អនុវត្តតាមប្រសាសន៍ដ៏ខ្ពង់ខ្ពស់របស់ប្រមុខថ្នាក់ដឹកនាំនៃរាជរដ្ឋាភិបាល នៅពេលនេះរដ្ឋាករទឹកស្វយ័តក្រុងភ្នំពេញ បានសម្រេចអនុគ្រោះជួយបង់ថ្លៃទឹកជំនួសជូនបណ្តាកម្មករកម្មការិនីរោងចក្រ ដែលបានកំពុងស្នាក់នៅតាមផ្ទះជួលចំនួន ៨៧០ទីតាំងផ្ទះជួល ដែលបានចុះបញ្ជីប្រើប្រាស់ទឹករបស់រដ្ឋាករទឹកស្វយ័តក្រុងភ្នំពេញ ហើយបានស្ថិតនៅក្នុងតំបន់ក្រហមនៅក្នុងរាជធានីភ្នំពេញ និងក្រុងតាខ្មៅ នៃខេត្តកណ្តាលចំនួន៣ខែ ចាប់ពីខែមីនា ដល់ខែឧសភា។
បើតាមឯកឧត្តម ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញ បានថ្លែងប្រាប់BTV នៅថ្ងៃទី១០ ខែឧសភានេះថា សម្រាប់កម្មករកម្មការនីដែលស្នាក់ក្នុងបន្ទប់ជួលក្នុងតំបន់ក្រហមនៅក្នុងរាជធានីភ្នំពេញ និងក្រុងតាខ្មៅ ហើយបានបង់វិក្កយបត្រប្រើប្រាស់ទឹកក្នុងខែមីនា និងខែមេសារួចហើយ រដ្ឋាករទឹកស្វយ័តក្រុងភ្នំពេញ នឹងធ្វើការបង់សងត្រឡប់វិញនៅក្នុងវិក្កយបត្រទឹកដែលនឹងចេញនៅខែក្រោយនេះ។
ឯកឧត្តម ស៊ឹម ស៊ីថា បញ្ជាក់ថា កម្មករ កម្មការនីសិស្សនិស្សិតដែលស្ថិតក្នុងតំបន់លឿងទុំនិងតំបន់លឿង គឺរដ្ឋាករទឹកស្វយ័តក្រុងភ្នំពេញ មិនមានគោលការណ៍បង់ថ្លៃទឹកជួសនោះទេ ប៉ុន្តែ យើងបានបន្ធូរបន្ថយលក្ខខណ្ឌខ្លះៗ ហើយអ្នកមកបង់ថ្លៃទឹកយឺតយ៉ាវ ដោយយើងមិនផាកពិន័យ និងមិនចុះទៅបិទទឹកផ្អាកការផ្គត់ផ្គង់ទឹកនោះទេ ពោលគឺយើងនៅតែបន្តយោគយល់ពន្យារការបង់ និងបន្តផ្គត់ផ្គង់ទឹកជាធម្មតា។
សូមបញ្ជាក់ថា នៅក្នុងអំឡុងពេលដែលរាជរដ្ឋាភិបាលប្រកាសបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ រយៈពេល៣សប្តាហ៍កន្លងមកនេះ បានធ្វើអោយកម្មករកម្មការិនីរោងចក្រកំពុងស្នាក់នៅក្នុងផ្ទះជួលកន្លងមក បានផ្អាកការងារដោយសាររោងចក្រផ្អាកដំណើរការ ហើយរហូតមកដល់ពេលនេះ មានរោងចក្រមួយចំនួនធំបានបើកដំណើរការឡើង ប៉ុន្តែ ការចូលបំរើការងារវិញរបស់កម្មករកម្មការនី គឺមិនទាន់មានដំណើរការល្អនោះទេ ពោល គឺរោងចក្រខ្លះ បានកាត់បន្ថយចំនួនកម្មករចូលធ្វើការនៅក្នុងរោងចក្រ ដោយបានប្តូរវេនចូលធ្វើការងារ និងឈប់សំរាកចំនួន២សប្តាហ៍ម្តង ដែលបញ្ហាធ្វើអោយប៉ះពាលការប្រើប្រាស់ថ្លៃទឹក ថ្លៃភ្លើង និងចំណាយចំបាច់នានាទៀត៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
