ភ្នំពេញ៖ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអំពាវនាវដល់បងប្អូនអ្នកលេងបណ្ដាញសង្គមហ្វេសប៊ុកទាំងអស់បញ្ឈប់ជាបន្ទាន់ ចំពោះប្រតិកម្មផ្សេងៗទៅលើតារាចម្រៀង មាស សុខសោភា ទាក់ទងនឹងបទចម្រៀង «មរណភាពព្រះស្វាមីជ័យវរ្ម័នទី៧» ។

ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សា ពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ចសរុបជិត៦ពាន់នាក់ នាព្រឹកថ្ងៃទី៥ ខែមិថុនា ឆ្នាំ២០២៣នេះសម្តេចតេជោ ហ៊ុន សែន បានលើកឡើងថា ទាក់ទងនឹងបទចម្រៀង​របស់អ្នកនាង មាស សុខសោភា ជារឿងដ៏ធំហើយក៏វាខុសស្រលះពីប្រវត្តិសាស្រ្តផងដែរ ប៉ុន្តែទោះជាយ៉ាងណានាងត្រូវបានធ្វើការ សូមទោសជាសាធារណៈ ហើយក៏បានលុបចេញពីហ្វេសប៊ុក និងយូធូបដែលបានបង្ហោះផងដែរ។

សូមបញ្ជាក់ថា ទាក់ទង នឹងបទចម្រៀងរបស់តារាចម្រៀង មាស សុខសោភា ដែលមានចំណងជើង ថា«មរណភាពព្រះស្វាមីជ័យវរ្ម័នទី៧» ត្រូវបានមហាជន​មកពីគ្រប់ទិសទីមានប្រតិកម្ម​យ៉ាងខ្លាំង​បន្ទាប់ពីអត្ថន័យក្នុងបទចម្រៀងនេះ ​បាននិពន្ធដោយបំភ្លៃ និងខុសស្រលះពីប្រវត្តិសាស្រ្តខ្មែរ។ យ៉ាងណាក៏ដោយបន្ទាប់ពីមានការអំពាវនាវ​ពី​សម្តេចតេជោ ហ៊ុន សែន នាយករដ្ឋមន្រ្តី​បទចម្រៀងនេះ ត្រូវបានលុបចោលពីបណ្តាញសង្គម ​និងយូធូប ហើយអ្នកចម្រៀងស្រីរូបនេះ ក៏បាន​ប្រកាសទទួលកំហុស​ និងធ្វើការសូមទោសដល់មហាជន ​និងក្រសួងវប្បធម៌ និង​វិចិត្រសិល្បៈផងដែរ៕អត្ថបទ៖ បាន ចក់