​នៅ​ថ្ងៃ​ចន្ទ ( ៥ មិថុនា​)​នេះ ក្រុមមន្ត្រី​តុលាការ​សហព័ន្ធ​អូស្ត្រាលី បានចាប់ផ្តើម​សវនាការ​លើ​បណ្តឹង​ដែល​ប្តឹង​ដោយ​ក្រុម​អ្នករស់នៅ​លើ​ប្រជុំ​កោះ Torres Strait ដោយ​ចោទប្រកាន់ថា រដ្ឋាភិបាល​អូស្ត្រាលី បាន​បរាជ័យ​ក្នុងការ​ការពារ​ពួកគេ​ពី​បម្រែបម្រួល​អាកាសធាតុ​ដែល​គំរាមកំហែង​បំផ្លាញ​ជម្រក​របស់​ពួកគេ​។​

​បណ្ដឹង​នេះ ជា​បណ្តឹង​រួម​ផ្នែក​អាកាសធាតុ​ដំបូង ដែល​ប​ញ្ចូ​ន​ដោយ​ជនជាតិ​លើកដំបូង របស់​អូស្ត្រាលី ត្រូវបាន​ដាក់ជូនទៅ​តុលាការ​កាលពី​ឆ្នាំ ២០២១ តំណាង​ឲ្យ​ប្រជុំ​កោះដាច់​ស្រយាល Boigu និង​កោះ Saibai ក្នុង​ច្រក​សមុទ្រ Torres ក្បែរ​ឆ្នេរសមុទ្រ​ភាគ​ខាងជើង​នៃ​ប្រទេស​អូស្ត្រាលី​។​

​សវនាការ​ដំបូង​នឹងធ្វើ​ឡើង​នៅ​ប្រជុំ​កោះ​នេះ​រហូតដល់​ថ្ងៃទី ១៩ ខែមិថុនា ដោយ​តុលាការ​រំពឹងថា​នឹង​ស្តាប់​ការបំភ្លឺ​ពី​បណ្ដា​អ្នករស់នៅ​លើ​កោះ រួមទាំង​ដើមបណ្តឹង​ពីរ​នាក់​គឺ​លោក Paul Kabai និង​លោក Pabai Pabai អំពី​ការគំរាមកំហែង​ពី​កំណើន​នីវ៉ូ​សមុទ្រ​ដែល​ប៉ះពាល់​ដល់​វប្បធម៌ ជីវិត និង​ជម្រក​របស់​ពួកគេ​។​

​ប្រជុំ​កោះ​នៅ​ច្រក​សមុទ្រ Torres ដែល​ស្ថិតនៅ​ភាគ​ខាងជើង​នៃ​ប្រទេស​អូស្ត្រាលី ប្រឈម​នឹង​ការគំរាមកំហែង​នៃ​ទឹកជំនន់ និង​កម្រិត​ជាតិ​អំបិល​ក្នុង​ទឹក​ដែល​បំផ្លាញ​ដី​របស់​ពួកគេ ដោយសារ​ការឡើង​កំដៅ​ផែនដី​នាំឱ្យមាន​ព្យុះ​កាន់តែច្រើន និង​កំណើន​នីវ៉ូ​សមុទ្រ​។​

​បណ្ដឹង​នេះ​ត្រូវបាន​គាំទ្រ​ដោយ​ក្រុម​តស៊ូ​មតិ​មិន​ស្វែងរក​ប្រាក់ចំណេញ Grata Fund និង​ក្រុម Urgenda Foundation ហើយ​កំពុងដំណើរការ​ដោយ​ក្រុមហ៊ុន​ទទួល​បណ្តឹង​រួម Phi Finney McDonald៕​