កាលពីថ្ងៃចន្ទ (៥មិថុនា) រដ្ឋាភិបាលប្រេស៊ីល បានបង្ហាញពីមធ្យោបាយដែលខ្លួនគ្រោង នឹងបំពេញតាមការសន្យាដើម្បីលុបបំបាត់ការកាប់បំផ្លាញព្រៃឈើនៅតំបន់ព្រៃអាម៉ាហ្សូនត្រឹមឆ្នាំ ២០៣០ ដោយពង្រឹងការអនុវត្តច្បាប់ប្រឆាំង នឹងឧក្រិដ្ឋកម្មបរិស្ថាន និងវិធានការផ្សេងៗទៀត នៅក្នុងតំបន់ព្រៃជប់ភ្លៀងត្រូពិចដ៏ធំបំផុតរបស់ពិភពលោកមួយនេះ។

ក្រោមការដឹកនាំរបស់អតីតប្រធានាធិបតីស្តាំនិយមលោក Jair Bolsonaro ប្រទេសប្រេស៊ីលបានចូលរួមសន្ធិសញ្ញាឆ្នាំ ២០២១ ជាមួយប្រទេសជាង ១៤០ ដើម្បីបញ្ចប់ការកាប់បំផ្លាញព្រៃឈើទូទាំងពិភពលោកត្រឹមឆ្នាំ ២០៣០។ ប្រធានាធិបតីឆ្វេងនិយមលោក Luiz Inacio Lula da Silva ដែលចូលកាន់តំណែងកាលពីថ្ងៃទី ១ ខែមករា បានធ្វើឱ្យផែនការនេះក្លាយជាចំណុចសំខាន់នៃគោលនយោបាយបរិស្ថានរបស់លោក។

ផែនការសកម្មភាពសម្រាប់ការទប់ស្កាត់ និងគ្រប់គ្រងការកាប់បំផ្លាញព្រៃឈើនៅតំបន់ព្រៃ អាម៉ាហ្សូន (PPCDAm) ដែលត្រូវបានដាក់បង្ហាញក្នុងអំឡុងព្រឹត្តិការណ៍របស់រដ្ឋាភិបាល ដើម្បីប្រារព្ធទិវាបរិស្ថាន និងកំណត់គោលនយោបាយសម្របសម្រួលនៅទូទាំងរាប់សិបក្រសួងរបស់ប្រេស៊ីលរហូតដល់ចុងបញ្ចប់នៃអាណត្តិប្រធានាធិបតីរបស់លោក Lula ក្នុងឆ្នាំ ២០២៧។

លោកប្រធានាធិបតីប្រេស៊ីលក៏បានរំលឹកដល់វិញ្ញាណក្ខន្ធអ្នកកាសែតអង់គ្លេសលោក Dom Phillips និងអ្នកជំនាញជនជាតិដើមភាគតិចលោក Bruno Pereira ដែលត្រូវបានសម្លាប់កាលពីមួយឆ្នាំមុននៅតំបន់ព្រៃអាម៉ាហ្សូនផងដែរ៕