ភ្នំពេញ៖ កម្ពុជា-ថៃ ប្រកាសដាក់ឱ្យដំណើរការគម្រោងស្កេន QR Code (ថៃស្កេនឃ្យូអរកូតនៅកម្ពុជា) ដំណាក់កាលទី២ ដើម្បីផ្តល់អត្ថប្រយោជន៍សម្រាប់លើកកម្ពស់ការទូទាត់រូបិយវត្ថុជាតិ ដែលជាផ្នែកមួយចូលរួមចំណែកយ៉ាងសំខាន់ ក្នុងការជំរុញបរិយាបន្នហិរញ្ញវត្ថុ និងការធ្វើពាណិជ្ជកម្មឆ្លងដែន។
ឯកឧត្ដមបណ្ឌិត ជា ចាន់តូ ទេសាភិបាលធនាគារជាតិនៃកម្ពុជា និងឯកឧត្តមបណ្ឌិត Sethaput Suthiwart-Narueput ទេសាភិបាលធនាគារកណ្តាលថៃ នៅថ្ងៃទី៦ ខែមិថុនា ឆ្នាំ២០២៣ នេះ បានបើកកិច្ចប្រជុំទ្វេភាគី នៅរាជធានីភ្នំពេញ ក្នុងគោលបំណងពង្រឹងសាមគ្គីភាព មិត្តភាព ពង្រឹងទំនាក់ទំនងសេដ្ឋកិច្ច និងជំរុញការរីកចម្រើននៃម៉ាក្រូសេដ្ឋកិច្ចវិស័យធនាគារ និងបច្ចេកវិទ្យាហិរញ្ញវត្ថុ (FinTech) ក្នុងប្រទេសទាំងពីរឱ្យកាន់តែប្រសើរថែមទៀត។
ក្នុងឱកាសនេះ ឯកឧត្តម បណ្ឌិត ជា ចាន់តូ ទេសាភិបាលធនាគារជាតិ នៃកម្ពុជា និងឯកឧត្តម បណ្ឌិត Sethaput Suthiwart-Narueput ទេសាភិបាលធនាគារកណ្តាលថៃ បានអញ្ជើញជាអធិបតី ក្នុងពិធីប្រកាសដាក់ឱ្យប្រើប្រាស់ការទូទាត់ឆ្លងដែនតាមរយៈឃ្យូអរកូត (QR Code) រវាងព្រះរាជាណាចក្រកម្ពុជា និងព្រះរាជាណាចក្រថៃ ដំណាក់កាលទី២៖ (ថៃស្កេនឃ្យូអរកូតនៅកម្ពុជា)។ ការដាក់ឱ្យដំណើរការគម្រោងនេះ មានអត្ថប្រយោជន៍ណាស់ សម្រាប់លើកកម្ពស់ការទូទាត់រូបិយវត្ថុជាតិ ហើយបានរួមចំណែកយ៉ាងសំខាន់ ក្នុងការជំរុញបរិយាបន្នហិរញ្ញវត្ថុ សម្រួលការធ្វើពាណិជ្ជកម្មឆ្លងដែន និងកំណើនភ្ញៀវទេសចរផងដែរ។
សូមបញ្ជាក់ថា គម្រោងនេះ មានជាពីរដំណាក់កាល ក្នុងនោះ សម្រាប់ដំណាក់កាលទី១ ប្រជាជនកម្ពុជាអាចស្កេនឃ្យូអរកូតនៅប្រទេសថៃ ដែលបានដាក់ឱ្យដំណើរការជាផ្លូវការក្នុងកិច្ចប្រជុំទ្វេភាគី រវាងធនាគារកណ្តាលនៃប្រទេសទាំងពីរ កាលពីថ្ងៃទី១៨ ខែកុម្ភៈ ឆ្នាំ២០២០ នៅប្រទេសថៃ។
ចំណែកក្នុងដំណាក់កាលទី២ នេះ ប្រជាជនថៃ ស្កេនឃ្យូអរកូតនៅព្រះរាជាណាចក្រកម្ពុជា ដែលគម្រោងនេះនឹងចាប់ដាក់ឱ្យប្រើប្រាស់ចាប់ពីទី ៦ ខែ មិថុនា ឆ្នាំ២០២៣ នេះតទៅ ក្នុងនោះប្រជាពលរដ្ឋថៃ អាចប្រើប្រាស់កម្មវិធីធនាគារចល័តរបស់ប្រទេសថៃ ដើម្បីស្កេនឃ្យូអរកូត ទៅកាន់ពាណិជ្ជករប្រមាណ ១.៥ លានពាណិជ្ជករ ក្នុងព្រះរាជាណាចក្រកម្ពុជា៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
