ភ្នំពេញ៖ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន មានប្រសាសន៍ថា ផ្លួវល្បឿនលឿនភ្នំពេញ-បាវិត នឹងជួយលើកកម្ពស់ វិនិយោគ ពាណិជ្ជកម្ម ក្នុងតំបន់ស្រុកល្វាម ខេត្តកណ្តាល និងការដឹកជញ្ជូន និងទេសចរណ៍ រវាងកម្ពុជា និងវៀតណាម។

ថ្លែងក្នុងពិធីបើកការដ្ឋានសាងសង់ផ្លូវល្បឿនលឿនភ្នំពេញ-បាវិត នៅថ្ងៃទី៧ ខែមិថុនា ឯកឧត្តម ស៊ុន ចាន់ថុល មានប្រសាសន៍ថា ផ្លូវល្បឿនលឿនភ្នំពេញ-បាវិត គឺជាខ្សែសេដ្ឋកិច្ច ដ៏មានសក្តានុពល របស់កម្ពុជា តភ្ជាប់ពីរាជធានីភ្នំពេញ ទៅក្រុងបាវិត។

ឯកឧត្តម ស៊ុន ចាន់ថុល ថ្លែងថា៖ “ផ្លូវល្បឿនលឿននេះ នឹងជំរុញឲ្យមានកំណើនវិនិយោគ ពាណិជ្ជកម្ម និងទេសចរណ៍នៅរាជធានីភ្នំពេញ និងក្រុងថ្មី អរិយក្សត្រ នៃខេត្តកណ្តាល ខេត្តព្រៃវែង ខេត្តស្វាយរៀង និងក្រុងបាវិត ជាពិសេសសកម្មភាពពាណិជ្ជកម្ម ទេសចរណ៍ និងការដឹកជញ្ជូនឆ្លងកាត់ព្រំដែនជាលក្ខណៈទ្វេភាគី រវាងកម្ពុជា និងវៀតណាមបន្ថែមទៀត”។

បន្ថែមលើនេះ ផ្លូវល្បឿនលឿននេះ ក៏នឹងក្លាយជាផ្នែកមួយយ៉ាងសំខាន់ក្នុងការបំពេញបន្ថែម​លើ​ផ្លូវហាយវ៉េលេខមួយ ដែលនឹងជួយសម្រួលបន្ថែមនូវការតភ្ជាប់ប្រទាក់ក្រឡានៃផ្ទៃក្នុងប្រទេស និង​ការតភ្ជាប់កម្ពុជា ទៅក្នុងក្របខណ្ឌតំបន់អាស៊ាន និងមហាអនុតំបន់មេគង្គ ឲ្យកាន់តែទូលំទូលាយ​ដើម្បីពង្រឹងសក្តានុពេលនៃទីផ្សារ ការប្រកួតប្រជែង​ និងភាពទន់សេដ្ឋកិច្ច-សង្គម តាមរយៈធ្វើការធ្វើឲ្យកាន់តែស៊ីចង្វាក់គ្នា ។

ឯកឧត្តម ស៊ុន ចាន់ថុល លើកឡើងទៀតថា ការតភ្ជាប់ហេដ្ឋារចនាសម្ព័ន្ធ ត្រូវបានចាត់ទុកជាក្បាល​ម៉ាស៊ីន​ជំរុញកំណើនសេដ្ឋកិច្ចជាតិ និងកាត់បន្ថយភាពក្រីក្ររបស់ប្រជាពលរដ្ឋ​បានយ៉ាងឆាប់រហ័ស។

កសាងដោយក្រុមហ៊ុន សាជីវកម្មស្ពាន និងថ្នល់ចិន ផ្លូវល្បឿនលឿនភ្នំពេញ-បាវិត ​មានប្រវែង ១៣៥គីឡូម៉ែត្រ ដោយថវិកាវិនិយោគសាងសង់ ប្រមាណ ១,៣៥ប៊ីលានដុល្លារ ក្រោមទម្រង់​វិនិយោគសាងសង់-ប្រតិបត្តិការ-ផ្ទេរ(BOT) ដែលមានរយៈពេលប្រតិបត្តិការចំនួន ៥០ឆ្នាំ ដោយគ្រោងបញ្ចប់ការសាងសង់នៅឆ្នាំ២០២៧៕ អត្ថបទ៖ វណ្ណៈ