ដោយដើរដង្ហែជាមួយអ្នកកាន់ទុក្ខរាប់សិបនាក់ កាលពីថ្ងៃអង្គារ (ទី៦ ខែមិថុនា) ប្រជាជនប៉ាឡេស្ទីន បានចូលរួមពិធីបុណ្យសពកុមារ Mohammad Al-Tamimi អាយុ៣ខួប ដែលបានស្លាប់ ដោយសារការរងរបួស បន្ទាប់ពីទាហានអ៊ីស្រាអែល បាញ់ត្រូវកាលពីសប្តាហ៍មុន។

ដោយរួមដំណើរជាមួយម្តាយរបស់កុមាររងគ្រោះ លោកស្រី Marwa al-Tamimi បានបីកូនតូចរបស់លោកស្រីជាលើកចុងក្រោយ ផ្ទៃមុខរបស់កុមារនោះ ស្ថិតក្នុងដៃរបស់លោកស្រី ខណៈដែលលោកស្រីឱនទៅថើបថ្ងាសរបស់ក្មេងប្រុស ហើយបន្ទាប់មកលោកស្រីបានអំពាវនាវរកយុត្តិធម៌ ពេលបានចូលរួមពិធីបុណ្យសពក្មេងប្រុស នៅតំបន់គ្រប់គ្រងវ៉េសប៊ែង (West Bank) ។

អ្នកស្រី បានបន្តថា៖ «ខ្ញុំចង់បានយុត្តិធម៌សម្រាប់កូនប្រុសរបស់ខ្ញុំ និងចង់ឲ្យអ្នកដែលបានបាញ់សម្លាប់ប្តី និងកូនរបស់ខ្ញុំទទួលខុសត្រូវ ចំពោះទង្វើរបស់គេ»។

កុមាររងគ្រោះ Mohammad ដែលម្តាយរបស់គេ បាននិយាយថា ខ្វះប៉ុន្មានខែដល់ខួប ៣ឆ្នាំរបស់គេនោះ បានស្លាប់ កាលពីថ្ងៃចន្ទ ដោយសាររបួស ដែលត្រូវគ្រាប់កាំភ្លើងបាញ់ចំក្បាល បន្ទាប់ពីកុមានោះ និងឪពុករបស់គេ បានរងការបាញ់ប្រហារពីកងកម្លាំងអ៊ីស្រាអែលនៅក្បែរផ្ទះរបស់ពួកគេ ខណៈពេលកំពុងបើកបរទៅសួរសុខទុក្ខសាច់ញាតិ។

នៅក្នុងសេចក្តីថ្លែងការណ៍មួយបន្ទាប់ពីហេតុការណ៍នេះ យោធាអ៊ីស្រាអែល បានឲ្យដឹងថា ទាហានបានឆ្លើយតបទៅនឹងការបាញ់ប្រហារ ដោយក្រុមជនវាយប្រហារឆ្ពោះទៅកាន់ការតាំងលំនៅឋានរបស់ជនជាតិជ្វីហ្វ ហើយជនជាតិប៉ាឡេស្ទីនពីរនាក់ ក្នុងនោះរួមទាំងកុមារម្នាក់ផង បានរងរបួស។

យោងតាមការិយាល័យការពារកុមារអន្តរជាតិប៉ាឡេស្ទីន (DCIP) បានឲ្យដឹងថា កុមារងគ្រោះ Al-Tamimi គឺជាអនីតិជនប៉ាឡេស្ទីនម្នាក់ ក្នុងចំណោម ២៧នាក់ ដែលត្រូវបានសម្លាប់ដោយសារសកម្មភាពយោធា និងការតាំងទីលំនៅរបស់អ៊ីស្រាអែល នៅតំបន់វ៉េសប៊ែង (West Bank) និងហ្គាហ្សា (Gaza) ចាប់តាំងពីខែមករាមក៕