កោះតៃវ៉ាន់បានចាប់ផ្ដើមធ្វើសកម្មភាពប្រព័ន្ធការពារជាតិរបស់ខ្លួន នៅថ្ងៃព្រហស្បតិ៍ (ទី៨ ខែមិថុនា)នេះ បន្ទាប់ពីមានសេចក្តីរាយការណ៍ថា យន្តហោះយោធាចិនចំនួន ៣៧គ្រឿង បានហោះហើរចូលទៅក្នុងតំបន់ការពារដែនអាកាសរបស់កោះនេះ ដោយយន្តហោះមួយចំនួនបន្ទាប់មកបានហោះចូលទៅក្នុងតំបន់ប៉ាស៊ីហ្វិកខាងលិច ក្នុងសកម្មភាពចូលលុកលុយដ៏ធំចុងក្រោយបំផុតរបស់ទីក្រុងប៉េកាំង។

ប្រទេសចិន ដែលចាត់ទុកថា តៃវ៉ាន់គ្រប់គ្រងតាមបែបប្រជាធិបតេយ្យនេះ ជាទឹកដីរបស់ខ្លួន ក្នុងរយៈពេលបីឆ្នាំចុងក្រោយនេះ តែងតែធ្វើប្រតិបត្តិការទ័ពអាកាសទៅកាន់លំហអាកាសក្បែរកោះនេះ ទោះបីជាមិនចូលទៅក្នុងលំហដែនអាកាសរបស់តៃវ៉ាន់ក៏ដោយ។

ក្រសួងការពារជាតិតៃវ៉ាន់ បាននិយាយថា ចាប់ពីម៉ោង ៥ព្រឹក ក្រសួងបានរកឃើញយន្តហោះរបស់កងទ័ពអាកាសចិនចំនួន ៣៧គ្រឿង ក្នុងនោះរួមមានទាំងយន្តហោះចម្បាំង J-11 និង J-16 ក៏ដូចជាយន្តហោះទម្លាក់គ្រាប់បែកដែលមានសមត្ថភាពបំពាក់ក្បាលគ្រាប់នុយក្លេអ៊ែ H-6 ដែលកំពុងហោះហើរចូលទៅក្នុងជ្រុងនិរតីនៃតំបន់កំណត់អត្តសញ្ញាណការពារដែនអាកាសរបស់ខ្លួន ឬ ADIZ។

ក្រសួងបានឲ្យដឹងនៅក្នុងសេចក្តីថ្លែងការណ៍មួយថា យន្តហោះចិនមួយចំនួន បានហោះទៅកាន់ភាគអាគ្នេយ៍របស់កោះតៃវ៉ាន់ ហើយបានឆ្លងចូលទៅក្នុងមហាសមុទ្រប៉ាស៊ីហ្វិកខាងលិច ដើម្បីប្រតិបត្តិការ «ឈ្លបយកការណ៍ផ្លូវអាកាស និងហ្វឹកហ្វឺនការរុករករយៈចម្ងាយឆ្ងាយ»។

កោះតៃវ៉ាន់បានបញ្ជូនយន្តហោះ និងនាវារបស់ខ្លួន ដើម្បីបន្តឃ្លាំមើល និងធ្វើសកម្មភាពប្រព័ន្ធមីស៊ីលនៅលើដី ដោយប្រើប្រាស់ពាក្យស្តង់ដាររបស់ខ្លួនថា ជាវិធីដែលឆ្លើយតបទៅនឹងសកម្មភាពរបស់ចិនបែបនេះ។

ពាក់ពា័ន្ធនឹងការលើកឡើងរបស់កោះតៃវ៉ាន់នេះ ក្រសួងការពារជាតិចិនមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ៕