​​អូឡាំពិក​៖ ​ប្រធាន​គណៈកម្មាធិការ​អូឡាំពិក​អន្តរជាតិ IOC លោក Thomas Bach បាន​ប្រកាស​លុប​ចោល​ដំណើរ​ទស្សនកិច្ច​របស់​ខ្លួន​ទៅកាន់​ប្រទេស​ជប៉ុន បន្ទាប់ពី​ប្រទេស​ម្ចាស់ផ្ទះ​អូឡាំពិក​មួយ​នេះ​ មានការ​កើន​ឡើង​ខ្លាំង​នៃ​ករណី​ឆ្លង​មេរោគ Covid-19 នេះ​បើ​តាម​ការ​បញ្ជាក់​របស់​គណៈកម្មាធិការ​អូឡាំពិក​ប្រទេស​ជប៉ុន​ អោយ​ដឹង​នៅ​ថ្ងៃ​ចន្ទ​ម្សិលមិញ​។

​​លោក Thomas Bach មាន​គំរោង​ទៅកាន់​ទីក្រុង Hiroshima នៅ​ថ្ងៃ​ចន្ទ​សប្តាហ៍​ក្រោយ ​ដើម្បី​ជួប​ជាមួយ​អ្នក​រត់​កាន់​គប់​ភ្លើង​អូឡាំពិក មុននឹង​បន្ត​ដំណើរ​ទស្សនកិច្ច​ទៅកាន់​ទីក្រុង​តូ​ក្យូ​។ យ៉ាង​ណាក្តី​ដំណើរ​ទស្សនកិច្ច​នេះ​មិន​អាច​ធ្វើ​ទៅ​បាន​ឡើយ ​ដោយសារតែ​ជប៉ុន​បាន​ពន្យារ​នៃ​ការ​ដាក់​ប្រទេស​ក្នុង​គ្រាអាសន្ន​ដល់​ថ្ងៃ​ទី​៣១ ខែ​ឧសភា​​។ តាម​ពិត​ទៅ​ការ​ដាក់​ប្រទេស​ក្នុង​គ្រាអាសន្ន​របស់​ជប៉ុន​បញ្ចប់​នៅ​ថ្ងៃ​អង្គារ​នេះ​។​

​​ការ​លុប​ចោម​ដំណើរ​ទស្សនកិច្ច​នេះ​ដែរ ​គឺជា​រឿង​រសើប​មួយ​សំរាប់ IOC និងគណៈកម្មការ​រៀបចំ​ព្រឹត្តិការណ៍ ខណៈ​ការប្រកួត​អូឡាំពិក​រដូវ​ក្តៅ​ នឹង​មកដល់​ក្នុង​រយៈពេល​តែ ១០​សប្ដាហ៍​ទៀត​ប៉ុណ្ណោះ ដែល​ទាំង​អស់​នេះ​ក៏បាន​ក្លាយ​ជា​រឿង​ឈឺក្បាល និង​មន្ទិល​ថា ​អូឡាំពិក​ទីក្រុង​តូ​ក្យូ​ពិតជា​អាច​ដំណើរការ​ទៅ​បាន ​រឺ​យ៉ាងណា​ក្រោម​ពាក្យ​ថា​ ជា​ព្រឹត្តិការណ៍​ដែល​មាន​សុវត្ថិភាព​មួយ​នោះ​។​ ​​មកដល់ពេលនេះ​ជប៉ុន​មាន​អ្នក​ស្លាប់​ដោយ​ជំងឺ Covid-19 ប្រមាណ ១១០០០​នាក់​ហើយ ស្រប​ពេល​មេរោគ​បម្លែង​ខ្លួន​ថ្មី​ក៏​ត្រូវ​បាន​គេ​រាយការណ៍​ថា ​មាន​វត្តមាន​នៅ​លើ​ទឹកដី​ជប៉ុន​ផង​ដែរ​៕

​អត្ថបទ​៖​នាង សុភា​វុ​ធ