ភ្នំពេញ៖ ផ្លូវបេតុងថ្មីចំនួន០៣ខ្សែ ស្ថិតក្នុងសង្កាត់ទន្លេបាសាក់ ខណ្ឌចំការមន ត្រូវបានធ្វើពិធីបើកការដ្ឋានស្ថាបនាជាផ្លូវការ នាព្រឹកថ្ងៃទី០៩ ខែមិថុនា ឆ្នាំ២០២៣នេះ ក្រោមវត្តមានលោក កៀង ល័ក្ស អភិបាលខណ្ឌចំការមន និងមានការអញ្ជើញចូលរួមពីលោក លោកស្រី អភិបាលរង លោកចៅសង្កាត់ និងមន្ត្រីចំណុះជំនាញជាច្រើនទៀតផងដែរ ។

លោក ខាត់ ណារិទ្ធ ចៅសង្កាត់ទន្លេបាសាក់ បានអោយដឹងថា ផ្លូវបេតុងចំនួន៣ខ្សែ ដែលកំពុងធ្វើការស្ថាបនានេះ ជាបេតុងគ្មានសសៃដែក ដែលមានប្រវែងសរុប ៤៣២ម៉ែត្រ មានទទឹង០៥ម៉ែត្រ និងមានកម្រាស់០,១៥ម៉ែត្រ ដែលផ្លូវនេះ បានរៀបចំប្រព័ន្ធលូបង្ហូរទឹករួចជា​ស្រេចហើយមានមុខកាត់៦តឹកផងដែរ ។

លោកចៅសង្កាត់ បន្តថា ផ្លូវបេតុងកំពុងស្ថាបនានៅពេលនេះ មានពលរដ្ឋចំនួនជាង ៣៥០គ្រួសាររស់នៅជាប់ផ្លូវ ទទួលផលប្រយោជន៍និងភាពងាយស្រួល។

លោក លោក កៀង ល័ក្ស អភិបាលខណ្ឌចំការមន ​បានមានប្រសាសន៍ដឹងថា ផ្លូវបេតុងចំនួន០៣ខ្សែនេះ​ បានផ្តល់អត្ថប្រយោជន៍យ៉ាងសំខាន់សម្រាប់ពលរដ្ឋទូទៅទាំងក្នុងតំបន់ និងក្រៅតំបន់អាចប្រើប្រាស់បានជាប្រយោជន៍រួមទាំងអស់គ្នា ។

លោកអភិបាល​ បន្ថែមថា ដោយពិនិត្យឃើញថា ​កាលពីពេលមុនផ្លូវនេះ ទទួលរងការខូចខាតច្រើន ដោយ​មានជាជង្ហុក ហើយរៀងរាល់ខែភ្លៀងក៏មានទឹកលិចផងដែរ ទើបអាជ្ញាធរមូលដ្ឋាន​សង្កាត់ខណ្ឌ តាមរយៈគម្រោងមូលនិធិសង្កាត់ ​បានគិតគូរដាក់ប្រព័ន្ធលូបង្ហូរទឹក និងបើកការ​ស្ថាបនាផ្លូវថ្មីជូនពលរដ្ឋសម្រាប់ប្រើប្រាស់តែម្តង ។

បន្ថែមទៀតនោះ លោក អភិបាលបានសំណូមពរ និងអំពាវនាវដល់ពលរដ្ឋរស់នៅអមសងខាងផ្លូវ​ដែលត្រូវស្ថាបនា ​មានការយោគយល់ ​រាល់សកម្មភាពកាយផ្លូវដាក់លូជាដើម។ ​លោក អភិបាល ក៏បានឲ្យខាងជំនាញធ្វើយ៉ាង ​ឲ្យមានផលប៉ះពាល់តិចបំផុត​សម្រាប់បងប្អូនប្រជាពលរដ្ឋ។

ប្រជាពលរដ្ឋដែលរស់នៅតាមបណ្តោយផ្លូវបេតុងថ្មី ដែលកំពុងដំណើរការស្ថាបនា បាន​បង្ហាញក្តីរំភើប ​និងអារម្មណ៍សប្បាយរីករាយ ជាមួយនឹង​សមិទ្ធផល​ថ្មីនេះ សម្រាប់តំបន់​រស់នៅរបស់ពួកគាត់ទាំងអស់គ្នា ​ខណៈពីពេលមុនពួកគាត់ថា ផ្លូវនេះ​ មានសភាព​ទ្រុឌទ្រោម ​និង​មានទឹកលិចទៀតផងដែរ ​លំបាកក្នុងការធ្វើដំណើរ។

ពលរដ្ឋ បង្ហាញថា ​នៅពេលមានផ្លូវបេតុងថ្មីហើយនោះ ​ពួកគាត់អាចជិះម៉ូតូ ឬរថយន្ត​ធ្វើដំណើរឆ្លងកាត់បានយ៉ាងងាយស្រួល ពិសេសនោះពួកគាត់ក៏អាចប្រើប្រាស់​ផ្លូវ​សម្រាប់ការដើរធ្វើលំហាត់ប្រាណបាន ​នៅរៀងរាល់ព្រឹកព្រលឹម​ ឬក៏វេលាល្ងាចឡើងជាដើម ៕ អត្ថបទ៖ កុម្ភៈ