រុស្ស៊ី ៖ ប្រព័ន្ធផ្សព្វផ្សាយរដ្ឋនូវែលហ្សេឡង់ បានបើកការស៊ើបអង្កេត បន្ទាប់ពីអត្ថបទព័ត៌មានអំពីការវាយ​លុកលើប្រទេសអ៊ុយក្រែន ត្រូវបានកែសម្រួល ដើម្បីបង្ហាញពីអ្វី ដែលហៅថា «ទស្សនៈគាំទ្រប្រទេសរុស្ស៊ី»។

វិទ្យុផ្សាយសំឡេងនូវ៉ែលហ្សេឡង់ (RNZ) បានកែតម្រូវអត្ថបទព័ត៌មានយ៉ាងហោចណាស់ពីរ ដែលដើមឡើយសរសេរដោយទីភ្នាក់ងារព័ត៌មាន Reuters ដែលខ្លួនបាននិយាយថា ត្រូវបាន«កែសម្រួលមិនសមរម្យ» នៅពេលអត្ថបទទាំងនោះត្រូវផ្សាយឡើងវិញតាមអ៊ិនធឺណិត។

រឿងមួយត្រូវបានកែសម្រួល ដោយរួមបញ្ចូលការយោងទៅលើ «រដ្ឋាភិបាលនិយមលោកខាងលិច» របស់អ៊ុយក្រែន ដែលគាបសង្កត់ជនជាតិភាគតិចរុស្ស៊ី ខណៈដែលរឿងមួយទៀត បានពិពណ៌នាអំពីបដិវត្តន៍ម៉ៃដាន (Maidan) ឆ្នាំ២០១៤ ដែលបានផ្តួលរំលំប្រធានាធិបតីគាំទ្រក្រុងម៉ូស្គូ លោក Viktor Yanukovych ថា ជា «រដ្ឋប្រហារ»។

អ្នកនិយាយវិទ្យុផ្សាយសំឡេងនេះ បានឲ្យដឹងនៅក្នុងព្រឹត្តិបត្រព័ត៌មានមួយ កាលពីល្ងាចថ្ងៃសុក្រថា៖ «វិទ្យុផ្សាយសំឡេង RNZ កំពុងស៊ើបអង្កេតថា តើអត្ថបទព័ត៌មានមួយ ស្ដីពីជម្លោះអ៊ុយក្រែន នៅលើគេហទំព័ររបស់ខ្លួន ត្រូវបានកែសម្រួល ដើម្បីឆ្លុះបញ្ចាំងពីទស្សនៈគាំទ្ររុស្ស៊ី ឬយ៉ាងណា។ កំណែដែលបានចុះផ្សាយដោយ RNZ រួមបញ្ចូលសាច់រឿងក្លែងក្លាយនៃព្រឹត្តិការណ៍ទាំងនោះ។ អត្ថបទព័ត៌មានត្រូវបានកែតម្រូវ តាំងពីពេលនោះមក»។

ក្រោយមក វិទ្យុផ្សាយសំឡេងនេះ បានរកឃើញថា យ៉ាងហោចណាស់អត្ថបទព័ត៌មានមួយផ្សេងទៀត ត្រូវបានកែសម្រួល។ បុគ្គលិកម្នាក់ត្រូវបានដាក់ឲ្យសម្រាកពីការងារដោយរង់ចាំលទ្ធផលនៃការស៊ើបអង្កេត៕