សៀមរាប៖ ឯកឧត្តមបណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល បានអញ្ជើញជួបសំណេះសំណាលជាមួយក្រុមការងារយុវជនគណបក្សប្រជាជនកម្ពុជា ខេត្តសៀមរាប នៅថ្ងៃទី១០ ខែមិថុនា ឆ្នាំ២០២៣។

ថ្លែងក្នុងឱកាសនោះ ឯកឧត្តមបណ្ឌិត ហ៊ុន ម៉ាណែត បានលើកឡើងថា របបរាជានិយមអាស្រ័យរដ្ឋធម្មនុញ្ញនៅកម្ពុជា ត្រូវបានចាប់ផ្តើមអនុវត្តឡើងវិញនៅក្នុងឆ្នាំ១៩៩៣ ដែលជាឆ្នាំ នៃការបោះឆ្នោតជ្រើសតាំងតំណាងរាស្ត្រ នីតិកាលទី១ ហើយដំណើរការ​ប្រជាធិបតេយ្យនេះបានបន្តជារៀងរាល់៥ឆ្នាំម្តង​យ៉ាងទៀងទាត់ ដោយបានចាក់គ្រឹះយ៉ាងរឹងមាំ​បន្តិចម្តងៗ រហូតក្លាយជាគំរូដល់បណ្តាប្រទេសប្រជាធិបតេយ្យផ្សេងទៀត ដោយសារតួលេខ នៃអ្នកចូលរួមបោះឆ្នោតគ្រប់​អាណត្តិ​កន្លងមក ​មានអត្រាខ្ពស់គួរឲ្យកត់សម្គាល់។

បើតាមឯកឧត្តមបណ្ឌិត ហ៊ុន ម៉ាណែត, ក្នុងរយៈកាលកន្លងមកនេះ គណបក្សប្រជាជនកម្ពុជា គឺជាគណបក្សដែលនៅតែបន្តទទួលបានការគាំទ្រ និងជំនឿទុកចិត្តពីសំណាក់ប្រជាពលរដ្ឋ ហើយបានបន្តដឹកនាំរាជរដ្ឋាភិបាល ក្នុងបេសកកម្មបម្រើជាតិ និងប្រជាជន ដោយសម្រេចបាន​នូវវឌ្ឍនភាពសង្គម និងភាពសុខដុមរមនាក្រោមម្លប់នៃសន្តិភាព។

ឯកឧត្តមបណ្ឌិត ហ៊ុន ម៉ាណែត ថ្លែងថា៖«ភាពជោគជ័យរបស់គណបក្សប្រជាជនកម្ពុជា មិនបាន​កើតឡើង​ដោយចៃដន្យនោះទេ។ ​គណបក្សប្រជាជនកម្ពុជា អាចដឹកនាំប្រទេសបានជាង​៤០ឆ្នាំ​ដោយសារគណបក្សបានប្រកាន់ខ្ជាប់នូវគោលការណ៍សំខាន់ចំនួន៣ គឺ ជីវិត ជីវភាពរស់ និងកិត្តិយស»។

ដូច្នេះសូមសកម្មជនយុវជនបក្ស ដែលពាក់អាវរូបទេវតា ​និងមានបេះដូងលោតក្នុងចង្វាក់តែមួយ បន្តចូលរួមបម្រើបុព្វហេតុដ៏ត្រឹមត្រូវរបស់បក្ស ដើម្បីធ្វើយ៉ាងណារួមគ្នារុញច្រាននាវា​កម្ពុជា​ឆ្ពោះទៅកាន់វឌ្ឍនភាពរុងរឿងស្របតាមចក្ខុវិស័យ ​និងគោលដៅដែលបានកំណត់ក្នុងឆ្នាំ២០៥០៕