ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី និងជានាយឧត្តមសេនីយ៍ផុតលេខផ្កាយមាស៥ បានរំលឹកនិងជំរុញដល់កងយោធពលខេមរភូមិន្ទទាំងអស់ ត្រូវតែថែរក្សា និងការពារ​សុខសន្តិភាព​ឲ្យខាងតែបាន ហើយត្រូវទប់ស្កាត់ជាបន្ទាន់ចំពោះបុគ្គលណា ឬក្រុមណា ដែលមានចេតនាបំផ្លិតបំផ្លាញសន្តិភាពដែលកំពុងមានសព្វថ្ងៃនេះ។

ក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ សមិទ្ធផលនានានៅបញ្ជាការដ្ឋាន​កងពលតូចលេខ៧០ នាព្រឹកថ្ងៃទី១២ ខែមិថុនា ឆ្នាំ២០២៣នេះ សម្តេចតេជោ ហ៊ុន សែន បាន លើកឡើងថា សុខសន្តិភាព គឺជាកត្តាធំបំផុតមិនអាចកាត់ថ្លៃបាន ក្នុងការអភិវឌ្ឍប្រទេសជាតិ និងធ្វើឱ្យប្រសើរឡើងជីវភាពរបស់ប្រជាជនប្រចាំថ្ងៃ ដូច្នេះមិនថាកាលៈទេសៈណានោះទេ ត្រូវថែរក្សាការពារឲ្យបាន។

សម្តេចតេជោ ហ៊ុន សែន បានថ្លែងអំណរគុណដល់នាយទាហាន នាយទាហានរង និងពលទាហាន នៃកងយោធពលខេមរភូមិន្ទទាំងអស់ ​ដែលបានលះបង់អស់កម្លាំងកាយចិត្ត ក្នុងកិច្ចការពារសុខ​សន្តិភាព សណ្តាប់ធ្នាប់ជូនដល់ប្រជាជន និងប្រទេសជាតិ។

គុណបំណាច់យ៉ាងធំធេងរបស់កងយោធពលខេមរភូមិន្ទ មិនអាចបំភ្លេចបាននោះទេ ចំពោះលះបង់ និងការពលីគ្រប់បែបយ៉ាងសម្រាប់បូរណភាពទឹកដី៕ ដោយ៖ បាន ចក់