​យោងតាម​ក្រុមមន្ត្រី​បាន​ឲ្យ​ដឹងថា ក្រុម​សង្គ្រោះ​ដែល​ប្រតិបត្តិការ​គ្រឿងចក្រ​ធុន​ធ្ងន់​បានធ្វើការ​ពេញ​មួយ​យប់​កាលពី​ថ្ងៃអាទិត្យ (១១ មិថុនា​) បន្ទាប់ពី​ផ្នែក​មួយ​នៃ​ផ្លូវ​ហាយ​វេ​ដ៏​សំខាន់​នៅ​ឆ្នេរសមុទ្រ​ភាគ​ខាងកើត​នៃ​សហរដ្ឋអាមេរិក​បាន​បាក់​នៅ​ទីក្រុង​ហ្វី​ឡា​ឌែ​ល​ហ្វៀ ពេលដែល​រថយន្ត​ដឹក​ដឹក​ប្រេងសាំង​មួយគ្រឿង​បាន​ឆេះ​នៅក្រោម​ស្ពាន​ឆ្លងកាត់​នោះ​។​

​ខ្សែ​វីដេអូ​ពីលើ​អាកាស​បានបង្ហាញ​គ្រឿងយន្ត​អេ​ស្ការ​វ៉ា​ទ័​រ​ជីក​កកាយ​កម្ទេចកម្ទី​នៅ​ទីតាំង​នោះ​ទាំងយប់ ខណៈ​ដែលមាន​ផ្សែងហុយ​ចេញពី​គំនរ​បាក់បែក​នៃ​ផ្នែក​ដែល​បាន​បាក់​នៅ​គន្លង​ខាងជើង​នៃ​ផ្លូវ I-95 ដែលជា​ចំណុចប្រសព្វ​អន្តរ​រដ្ឋ​ខាងជើង​និង​ខាងត្បូង​នៅ​ឆ្នេរសមុទ្រ​ខាងកើត​។ ទីតាំង​ដែល​រង​ផលប៉ះពាល់​នៃ​ច្រករបៀង I-95 ស្ថិតនៅ​ប៉ែក​ឦសាន​នៃ​ទីក្រុង​ហ្វី​ឡា​ឌែ​ល​ហ្វៀ ហើយ​ភ្ជាប់​ទីក្រុង​នេះ​ទៅ​ជាយក្រុង​ភាគ​ខាងជើង ដូចជា​តំបន់ Bucks County ជាដើម​។​

​ពុំមាន​របាយការណ៍​ប​ញ្ជា​ក់​ពី​អ្នកស្លាប់ ឬ​របួស​នោះទេ ប៉ុន្តែ​ក្រុមមន្ត្រី​បាន​និយាយថា ស្ថានភាព​នៅតែ​រលូន ហើយ​ក្រុម​អ្នកស៊ើប​អង្កេត​កំពុង​បន្ត​ស្វែងរក​ដើម​ដាន​កន្លែងកើតហេតុ​នេះ​។​

​អភិបាលរដ្ឋ Pennsylvania លោក Josh Shapiro បាន​និយាយ​នៅក្នុង​សន្និសីទ​សារព័ត៌មាន​ថា តាម​ដំណើរ​ទំនង​នេះ នឹង​ចំណាយពេល "​ប៉ុន្មាន​ខែ​" ដើម្បី​ស្ថាបនា​នូវ​ផ្លូវ​ដែលមាន​រថយន្ត​ប្រហែល​១៦០.០០០ គ្រឿង ឆ្លងកាត់​ជា​រៀងរាល់​ថ្ងៃនេះ​ឡើងវិញ​។ លោក​បាន​និយាយថា រូបលោក​នឹង​ចុះហត្ថលេខា​លើ​សេចក្តីប្រកាស​គ្រោះមហន្តរាយ​នៅ​ថ្ងៃ​ច័ន្ទ (១២ មិថុនា​)​នេះ ដើម្បី​ប្រើប្រាស់​មូលនិធិ​សហព័ន្ធ​និង​ជំនួយ​ផ្សេងៗ​ទៀត​ក្នុងការ​ស្ថាបនា​ផ្លូវ​នេះ​ឡើងវិញ​៕​