កំពង់ចាម៖ មួយរយៈចុងក្រោយនេះ ជំងឺកូវីដ-១៩ បានជ្រាបចូលទៅក្នុងរោងចក្រមួយកន្លែងក្នុងស្រុកបាធាយ ដែលមានកម្មករកម្មការនីចំនួន ២០នាក់ ហើយដែលមានរកឃើញវិជ្ជមានកូវីដ-១៩ ប៉ុន្តែ ទោះបីជាយ៉ាងណាក៏ដោយ អាជ្ញាធរខេត្តកំពង់ចាម បានចេញវិធានភ្លាមៗក្នុងការបិទខ្ទប់ រោងចក្រ លី ឈាងខប ជាបណ្ដោះអាសន្នសិន។
ដើម្បីកាត់ផ្តាច់ខ្សែចម្លង នៃការឆ្លងរីករាលដាលជំងឺកូវីដ-១៩ ក្នុងព្រឹត្តិការណ៍ ២០កុម្ភៈ សម្រាប់ភូមិសាស្ត្រខេត្តកំពង់ចាម ជាក់ស្ដែងនៅកាលពីថ្ងៃទី១០ ខែឧសភា នេះ ក្រោយពីមានករណីរកឃើញអ្នកវិជ្ជមានកូវីដ-១៩ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បានចុះត្រួតពិនិត្យការបិទខ្ទប់ ភូមិអកទៀង ស្ថិតនៅឃុំតាំងក្រាំង និងទីតាំងរោងចក្រលីឈាងខប ក្នុងស្រុកបាធាយ។
ឯកឧត្ដម អភិបាលខេត្ត បានជំរុញលើកទឹកចិត្ត ដល់អាជ្ញាធរស្រុក សហការជាមួយ ក្រុមគ្រូពេទ្យ ក្នុងការតាមដាន និងត្រូវស្រាវជ្រាវបន្ថែមទៀតជាមួយអ្នកប៉ះពាល់ និងប្រយោលជាមួយអ្នកវិជ្ជមានកូវីដ-១៩។
ដោយគិតត្រឹមព្រឹកថ្ងៃទី១១ ខែឧសភានេះ រដ្ឋបាលខេត្តកំពង់ចាម បានចេញសេចក្តីសម្រេច បិទខ្ទប់ភូមិសរុប ចំនួន ១៨ភូមិហើយ និងបិទខ្ទប់រោងចក្រមួយទីតាំងផងដែរ ដោយមាននៅក្នុង ស្រុកស្រីសន្ធរ , ស្រុកបាធាយ និងស្រុកកងមាស ដើម្បីកាត់ផ្តាច់ខ្សែចម្លង និងដោយអនុវត្តតាមការណែនាំរបស់ក្រសួងសុខាភិបាលនោះផង រដ្ឋបាលខេត្តកំពង់ចាម បានចុះផ្សព្វផ្សាយ អប់រំណែនាំ និងធ្វើកិច្ចសន្យាចំពោះបុគ្គលដែលមិនបានអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាពវិធានការរបស់ក្រសួងសុខាភិបាល និងសេចក្តីណែនាំរបស់រដ្ឋបាលខេត្តកំពង់ចាម៕ អត្ថបទ៖ ថុង សីហា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
