អតីតនាយករដ្ឋមន្ត្រីអ៊ីតាលីលោក Silvio Berlusconi ជាធុរជនលំដាប់មហាសេដ្ឋីម្នាក់ ដែលបានបង្កើតក្រុមហ៊ុនប្រព័ន្ធផ្សព្វផ្សាយដ៏ធំបំផុតរបស់ប្រទេសអ៊ីតាលី និងដែលបានដឹកនាំក្លិប AC Milan ឲ្យទទួលបានជោគជ័យ ក្នុងវិស័យបាល់ទាត់អន្តរជាតិ មុនពេលផ្លាស់ប្តូរមកប្រឡូកក្នុងឆាកនយោបាយនោះ បានស្លាប់ ក្នុងវ័យ ៨៦ឆ្នាំ។

លោក Berlusconi បានទទួលមរណភាពនៅឯមន្ទីរពេទ្យ San Raffaele ក្នុងទីក្រុងមីឡាន (Milan) ប្រទេសអ៊ីតាលី ជាកន្លែងដែលរូបលោកបានចំណាយពេល ៦សប្តាហ៍ ដើម្បីទទួលការព្យាបាលការឆ្លងមេរោគសួត ដែលមានពាក់ព័ន្ធនឹងជំងឺមហារីកគ្រាប់ឈាមរ៉ាំរ៉ៃ មុនពេលធ្វើការព្យាបាលម្ដងទៀត ហើយបណ្ដាមេដឹកនាំធំៗទូទាំងពិភពលោក បានបញ្ចេញសារប្រតិកម្មចំពោះព័ត៌មានស្តីពីមរណភាពនេះ។

ខាងក្រោមនេះ គឺជាសារខ្លះរបស់ថ្នាក់ដឹកនាំធំៗ ដែលមានប្រតិកម្មនឹងដំណឹងនៃការបាត់បង់ជីវិតនេះ៖

នាយករដ្ឋមន្ត្រីអ៊ីតាលី លោកស្រី Giorgia Meloni(ជ័រចា ម៉ែលីនី) បានសរសេរថា៖ «លោក Silvio Berlusconi គឺប្រសើរជាងអ្នកតស៊ូប្រយុទ្ធទាំងអស់ ដោយលោកគឺជាបុរសម្នាក់ ដែលមិនខ្លាច ក្នុងការការពារនូវជំនឿចិត្តរបស់លោក ហើយវាច្បាស់ណាស់ថា ភាពក្លាហាននោះ និងការប្តេជ្ញាចិត្តនោះ បានធ្វើឲ្យរូបលោកក្លាយជាបុគ្គលដ៏មានឥទ្ធិពលបំផុត ក្នុងប្រវត្តិសាស្ត្រអ៊ីតាលី»។

លោក Vladimir Putin បានរៀបរាប់ថា៖ សម្រាប់ខ្ញុំ លោក Silvio គឺជាមនុស្សគួរជាទីស្រឡាញ់ ពោលគឺជាមិត្តពិតប្រាកដ។ ខ្ញុំតែងតែកោតសរសើរដោយស្មោះ ចំពោះប្រាជ្ញារបស់គាត់ សមត្ថភាពរបស់គាត់ ក្នុងការសម្រេចចិត្តប្រកបដោយការថ្លឹងថ្លែង និងមើលឃើញវែងឆ្ងាយ ទោះបីជាស្ថិតក្នុងស្ថានភាពលំបាកបំផុតក៏ដោយ»។ 

សម្ដេចសង្ឃកាតូលិក សម្ដេចប៉ាប ហ្វ្រង់ស៊ីស បានសរសរសារផ្ញើទៅកូនស្រីច្បងរបស់លោក Berlusconi លោកស្រី Marina ថា ព្រះអង្គបានផ្តល់នូវការចូលរួមដោយស្មោះស្ម័គ្ររបស់ព្រះអង្គ ក្នុងការកាន់ទុក្ខ ចំពោះការបាត់បង់តួអង្គដ៏សំខាន់នៃជីវិតនយោបាយអ៊ីតាលី ដែលបានទទួលខុសត្រូវជាសាធារណៈជាមួយនឹងនិស្ស័យដ៏ស្វាហាប់។

រដ្ឋមន្ត្រីការបរទេសសហរដ្ឋអាមេរិក លោក Antony Blinken បានសរសេរថា៖ «ច្បាស់ណាស់ រូបលោកគឺជាឥស្សរជនដ៏សំខាន់មួយរូប នៅក្នុងអាយុជីវិតរបស់ប្រទេសអ៊ីតាលី ក្នុងជីវិតនយោបាយ និងក្នុងជីវិតសាធារណៈរបស់ប្រទេសនេះ»៕