ប្រធានាធិបតីបេឡារុសលោក Alexander Lukashenko និយាយកាលពីថ្ងៃអង្គារម្សិលមិញថា អាវុធនុយក្លេអ៊ែរតាក់ទិករុស្ស៊ី នឹងត្រូវដាក់ពង្រាយលើទឹកដីបេឡារុស ក្នុងរយៈពេលប៉ុន្មានថ្ងៃទៀតនេះ ហើយលោកក៏មានទីតាំងរុក្សាទុកមីស៊ីលរយៈចម្ងាយឆ្ងាយផងដែរ បើសិនជាចាំបាច់ ។

ប្រធានាធិបតីរុស្ស៊ីលោក Vladimir Putin បាននិយាយកាលពីថ្ងៃសុក្រសប្តាហ៍មុនថា រុស្ស៊ីដែលនឹងរក្សាការគ្រប់គ្រងអាវុធនុយក្លេអ៊ែរតាក់ទិក នឹងចាប់ផ្តើមដាក់ពង្រាយអាវុធទាំងនេះ នៅប្រទេសសម្ព័ន្ធមិត្តជិតស្និទ្ធបេឡារុសក្រោយទីតាំងស្តុកពិសេសសម្រាប់រក្សាទុកវា ត្រូវបានកសាងរួចរាល់កាលពីថ្ងៃទី ៧-៨ ខែកក្កដា ។

ការដាក់ពង្រាយនេះ នឹងក្លាយជាការដាក់ពង្រាយអាវុធលើកដំបូងរបស់ទីក្រុងម៉ូស្គូ ដូចជាក្បាលគ្រាប់ អាវុធនុយក្លេអ៊ែររយៈចម្ងាយជិតដ៏មានឥទ្ធិពល ដែលអាចប្រើប្រាស់ប្រកបដោយសក្តានុពលនៅលើសមរភូមិប្រយុទ្ធ នៅក្រៅទឹកដីរុស្ស៊ី ចាប់តាំងពីការដួលរលំរបស់សហភាពសូវៀត ។

ចំណាត់ការបែបនេះ ត្រូវបានឃ្លាំមើលយ៉ាងដិតដល់ដោយសហរដ្ឋអាមេរិក និងប្រទេសសម្ព័ន្ធមិត្ត​របស់ពួកគេ ក៏ដូចជាប្រទេសចិនដែលបានព្រមានម្តងហើយម្តងទៀតប្រឆាំង​នឹងការប្រើប្រាស់អាវុធនុយក្លេអ៊ែរនៅក្នុងសង្រ្គាមអ៊ុយក្រែន ៕