អាមេរិក ៖ បាតុករម្នាក់ស្លៀកសម្លៀកបំពាក់អ្នកទោសត្រូវបានចាប់ខ្លួន បន្ទាប់ពីអតីតប្រធានាធិបតីអាមេរិកលោក ដូណាល់ ត្រាំ បានផ្តល់​ចម្លើយ​ពីភាពគ្មានទោសកាលពីថ្ងៃអង្គារ (១៣ មិថុនា) ចំពោះការចោទ​ប្រកាន់ព្រហ្មទណ្ឌ​របស់សហព័ន្ធពីបទចោទ​ប្រកាន់រក្សាទុកឯកសារសន្តិសុខជាតិដោយខុសច្បាប់នៅពេលលោកចេញពីតំណែង ហើយកុហកក្រុមមន្ត្រីដែលព្យាយាមស្វែងរកឯកសារទាំងនោះ។

ការផ្តល់ចម្លើយរបស់លោក ត្រាំ ដែលបានធ្វើឡើងនៅចំពោះមុខចៅក្រមអាមេរិកលោក Jonathan Goodman នៅក្នុងតុលាការសហព័ន្ធក្នុងទីក្រុងម៉ៃអាមី បង្កើតឲ្យមានការតតាំងខាងផ្លូវច្បាប់ដែល​ទំនងជានឹងធ្វើឡើ​ងក្នុង​រយៈពេលប៉ុន្មានខែខាងមុខនេះ ខណៈដែលលោក ត្រាំ ធ្វើយុទ្ធនាការបោះឆ្នោតដើម្បីឈ្នះតំណែង​ប្រធានាធិបតី​សម្រាប់ការបោះឆ្នោតនៅខែវិច្ឆិកា ឆ្នាំ ២០២៤ ។ ក្រុមអ្នកជំនាញនិយាយថា វាអាចមានរយៈពេលមួយឆ្នាំ ឬច្រើនជាងនេះ មុនពេលការកាត់ក្ដីនឹងធ្វើឡើង។

លោក ត្រាំ ដែលពាក់ឈុតពណ៌ខៀវ និងក្រវាត់កពណ៌ក្រហម បានចងចិញ្ចើមបែបងឿងឆ្ងល់និងអង្គុយផ្អែកនឹងកៅអី ប៉ុន្តែមិនបាននិយាយអ្វីឡើយក្នុងអំឡុងពេលសវនាការរយៈពេល ៤៧ នាទីនោះ។ លោកត្រូវបានអនុញ្ញាតឱ្យចាកចេញពីតុលាការដោយគ្មានលក្ខខណ្ឌ ឬការរឹតត្បិតការធ្វើដំណើរអ្វីឡើយ និងមិនចាំបាច់មានទ្រព្យតម្កល់ធានានោះឡើយ។ លោកចៅក្រម Goodman បានសម្រេចថាលោក ត្រាំ មិនត្រូវបានអនុញ្ញាតឱ្យទំនាក់ទំនងជាមួយសាក្សីសំខាន់ៗក្នុងសំណុំរឿងនោះទេ៕