កេនយ៉ា ៖ អ្នកបោះឆ្នោត ៨០ភាគរយ នៅមណ្ឌលបោះឆ្នោត ដែលស្ថិតនៅចំកណ្តាលប្រទេសផលិតតែ កេនយ៉ា បានទម្លាក់សន្លឹកឆ្នោតគាំទ្រលោក William Ruto កាលពីខែសីហាឆ្នាំមុន ដោយជួយឲ្យជើងឯក​ស្វ័យ​ប្រកាសថាជាជនពូកែបង្កើតប្រាក់ ទទួលបានជ័យម្នះក្នុងការបោះឆ្នោតប្រធានាធិបតីដ៏រកាំរកូសមួយ។

តែពេលវេលាមិនដល់មួយឆ្នាំក្រោយមក វាគឺរឿងពិបាកក្នុងការរកនរណាម្នាក់នៅក្នុងខេត្ត Githunguri ដើម្បីនិយាយការពារសម្ដីរបស់លោក Ruto។

ចាប់តាំងពីលោក Ruto ឡើងកាន់តំណែង តម្លៃសម្រាប់មុខម្ហូបសំខាន់ចាំបាច់ បានបន្តឡើងថ្លៃ ហើយលោក​ក៏ប្រឈមនឹងការរិះគន់ ចំពោះការបង្កើនការបែងចែកការគ្រប់គ្រងដោយឡែកទៅការិយាល័យរបស់លោក និងរបស់អនុប្រធានាធិបតី ខណៈពេលដែលបន្ថយការឧបត្ថម្ភធនប្រេង។

ហើយឥឡូវនេះ ការស្នើដំឡើងពន្ធប្រេងឥន្ធនៈ និងផ្ទះសម្បែង កំពុងបង្កឲ្យមានប្រតិកម្មខ្លាំងបំផុតម្ដងទៀត និងជំរុញ​ឲ្យក្រុមប្រឆាំង ដែលបាតុកម្មរបស់ពួកគេនៅឆ្នាំនេះ នាំទៅរកការប៉ះទង្គិចម្តងហើយម្តងទៀតជាមួយនគរបាល នៅតាម​ដងផ្លូវនៃរដ្ឋធានីណៃរ៉ូប៊ី (Nairobi)។ សំណើដែលមាននៅក្នុងសេចក្តីស្នើច្បាប់ ដែលគេស្គាល់ថា គម្រោងច្បាប់​ហិរញ្ញវត្ថុ នឹងត្រូវបានពិចារណាដោយសភា រួមជាមួយនឹងកញ្ចប់ថវិកាឆ្នាំ២០២៣-២៤ ដែលនឹងត្រូវបង្ហាញដោយរដ្ឋមន្ត្រីហិរញ្ញវត្ថុ នៅថ្ងៃព្រហស្បតិ៍ (ទី១៥ ខែកក្កដា)។

នៅតាមដងផ្លូវដ៏មមាញឹករបស់ខេត្ត Githunguri អ្នកស្រុករាប់សិបនាក់ បានប្រមូលផ្តុំគ្នា ជុំវិញអ្នកយកព័ត៌មានរបស់​សារព័ត៌មាន Reuters ដើម្បីបញ្ចេញមតិប្រឆាំងរបស់ពួកគេ។ អ្នកនាង Jacqueline Wambui ដែលមានអាជីព​ជាអ្នកបម្រើម្នាក់ បាននិយាយថា នាងមានការសោកស្ដាយ ដែលបោះឆ្នោតឲ្យលោក Ruto កាលពីខែសីហាឆ្នាំមុន។ អ្នកនាងបានបន្តថា៖ «ការសន្យាដែលយើងត្រូវបានផ្តល់ឲ្យ ក្នុងនាមជាពាណិជ្ជករតូចតាច និងអ្នកប្រើប្រាស់​ម៉ូតូជាយានជំនិះ មិនបានកើតឡើងទេ»។

អ្នកនាំពាក្យរបស់លោក Ruto មិនបានឆ្លើយតបនឹងសំណើសុំការអត្ថាធិប្បាយនោះទេ។ ប្រធានាធិបតី និងសម្ព័ន្ធមិត្ត​របស់​លោក បាននិយាយការពារការដំឡើងពន្ធនេះ ដោយលើកឡើងថា ប្រទេសមហាអំណាចសេដ្ឋកិច្ច នៅអាហ្វ្រិក​ខាង​កើតមួយនេះ ត្រូវការប្រាក់ចំណូលបន្ថែម ដើម្បីបញ្ចៀសវិបត្តិបំណុល និងផ្តល់មូលនិធិ​ដល់គម្រោងលំនៅឋាន​ដែលមានតម្លៃសមរម្យ៕