ភ្នំពេញ៖ របាយការណ៍គណៈកម្មការចំពោះកិច្ចការចាក់វ៉ាក់សាំង បង្ហាញថា ពលរដ្ឋជិត ១.៩លាននាក់ហើយ បានទទួលវ៉ាក់សាំងនៅទូទាំងប្រទេសក្នុងរយៈពេល ៩១ថ្ងៃចុងក្រោយនេះ។
របាយការណ៍ចេញនៅយប់នេះ បានបញ្ជាក់ថា ពលរដ្ឋជាង ១លាន ៩៤ម៉ឺននាក់ បានចុះឈ្មោះស្ម័គ្រចិត្តចាក់វ៉ាក់សាំងដែលផ្ដល់ឱ្យដោយរាជរដ្ឋាភិបាលចាប់តាំងពីការចាប់ផ្ដើមយុទ្ធនាការចាក់វ៉ាក់សាំងនៅថ្ងៃទី១០ ខែកុម្ភៈកន្លងមកនេះ។
របាយការណ៍ឱ្យដឹងថា ពលរដ្ឋជិត ៧ម៉ឺននាក់ មិនត្រូវបានអនុញ្ញាតឱ្យចាក់វ៉ាក់សាំងនោះឡើយ ដោយសារបញ្ហាសុខភាព។
បើតាមរបាយការណ៍ដដែលនេះ ពលរដ្ឋជាង ១លាន ៨៧ម៉ឺននាក់ បានទទួលវ៉ាក់សាំងរួចហើយ ក្នុងនោះពលរដ្ឋដល់ទៅជាង ១លាន ១២ម៉ឺននាក់ បានទទួលវ៉ាក់សាំងទាំងពីរដូសរួចហើយដែរ។
របាយការណ៍នេះ បញ្ជាក់ថា តួលេខពលរដ្ឋចាក់វ៉ាក់សាំងនេះ ស្មើនឹងជាង ១៨ភាគរយនៃតួលេខពលរដ្ឋ ១០លាននាក់ ដែលរាជរដ្ឋាភិបាលកំណត់ចាក់វ៉ាក់សាំងនៅឆ្នាំនេះ។
កម្ពុជាបានចាប់ផ្ដើមយុទ្ធនាការចាក់វ៉ាក់សាំងទូទាំងប្រទេសចាប់តាំងពីថ្ងៃទី១០ ខែកុម្ភៈកន្លងមកនេះ ដោយចាប់ផ្ដើមចាក់ជាមួយវ៉ាក់សាំងស៊ីណូហ្វាមដែលជាជំនួយរបស់រដ្ឋាភិបាល ហើយបន្ទាប់មកទៀត កម្ពុជាទទួលបានវ៉ាក់សាំងខូវីហ្ស៊ែលរបស់ AstraZeneca ដែលផ្ដល់មកកម្ពុជាតាមរយៈយន្តការអង្គការសុខភាពពិភពលោក និងវ៉ាក់សាំងចិនស៊ីណូវ៉ាក់ ដែលកម្ពុជាបញ្ជាទិញពីប្រទេសចិន៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
