ភ្នំពេញ ៖ មន្ទីរពេទ្យកុមារជាតិ ក្រសួងសុខាភិបាល នៃព្រះរាជាណាចក្រកម្ពុជា សហការជាមួយមូលនិធិ Vita et Futura និងសមាគមរោងចក្រផលិតបរិក្ខារវេជ្ជសាស្ត្រ នៃសាធារណរដ្ឋឆែក នៅរសៀលថ្ងៃទី១៤ ខែមិថុនា ឆ្នាំ២០២៣នេះ បានបើក«ការតាំងពិព័រណ៍បរិក្ខារវេជ្ជសាស្ត្រ របស់សាធារណរដ្ឋឆែក ផ្តល់ជូនក្រសួងសុខាភិបាល» ក្រោម​អធិបតីភាពលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការប្រចាំការក្រសួងសុខាភិបាល និងឯកឧត្តម ជីរី កូហ្សាក (H.E. Jiří Kozák) អនុរដ្ឋមន្ត្រីទី១ នៃក្រសួងការបរទេសសាធារណៈរដ្ឋឆែក។

​ឯកឧត្តមសាស្ត្រាចារ្យ ញឹប អង្គាបុស្ស ទីប្រឹក្សាក្រសួងសុខាភិបាល និងជានាយកមន្ទីរពេទ្យកុមារជាតិ បានមាន​ប្រសាសន៍​ថា ពិព័រណ៍បរិក្ខារវេជ្ជសាស្ត្រទំនើបនៅមន្ទីរពេទ្យកុមារជាតិនាថ្ងៃនេះ នឹងជួយដល់មន្ទីរពេទ្យ ក្នុងការ​បង្កើន​លទ្ធភាពផ្តល់សេវាសុខភាពបែបទំនើបកម្ម និងគុណភាពខ្ពស់ដល់មាតា និងទារក ក្នុងនោះមានទាំងសេវា​រោគស្ត្រី សម្ភព ផែនការគ្រួសារ និងការថែទាំទារក នៅទូទាំងប្រទេសកម្ពុជា តាមរយៈការផ្តល់ជំនួយបរិក្ខារពេទ្យ​ទំនើបពីភាគីក្រុមហ៊ុនផលិតបរិក្ខារវេជ្ជសាស្ត្រ LINET នៃសាធារណៈរដ្ឋឆែក ជូនដល់មន្ទីរពេទ្យកុមារជាតិ និងការផ្តល់ជូននូវការបណ្តុះបណ្តាលពីបច្ចេកទេស និងបច្ចេកវិទ្យា នៃការប្រើប្រាស់សម្ភារៈទំនើបទាំងនោះ អមជាមួយការបណ្តុះបណ្តាលពង្រឹងសមត្ថភាពជំនាញបច្ចេកទេសថែទាំព្យាបាល ពីអ្នកជំនាញឯកទេសខាង​សាធារណៈរដ្ឋឆែក ដែលរៀបចំដោយ មូលនិធិ Vita et Futura  ដល់បុគ្គលិក នៃមន្ទីរពេទ្យកុមារជាតិផងដែរ។

ឯកឧត្តមសាស្ត្រាចារ្យ នាយកមនី្ទរពេទ្យ ក៏បានថ្លែងអំណរគុណដល់សមាគមរោងចក្រផលិត និងផ្គត់ផ្គង់​បរិក្ខារវេជ្ជសាស្ត្រ​នៃសាធារណៈរដ្ឋឆែក ជាពិសេសក្រុមហ៊ុនរោងចក្រផលិតបរិក្ខាវេជ្ជសាស្ត្រ LINET ដែលបរិច្ចាក​បរិក្ខារពេទ្យទំនើប ចំនួន៦មុខ ដែលសរុបជាទឹកប្រាក់ជាង៥ម៉ឺនដុល្លារសហរដ្ឋអាមេរិក ក្នុងការជួយបង្កើន​លទ្ធភាព​ដល់មន្ទីរពេទ្យកុមារជាតិ ដើម្បីអភិវឌ្ឍសេវាសុខាភិបាលកាន់តែទំនើប និងងាយស្រួលសម្រាប់ប្រជាពលរដ្ឋ។ បច្ចុប្បន្នមន្ទីរពេទ្យកុមារជាតិបានខិតខំប្រឹងប្រែងអភិវឌ្ឍទាំងគុណភាពសេវា បរិស្ថាន ហេដ្ឋារចនាសម្ព័ន្ធ និង​ការពង្រឹងសមត្ថភាពរបស់បុគ្គលិកគ្រប់ជំនាញ ក្នុងគោលបំណងផ្តល់ជូននូវសេវាសុខាភិបាល​ដល់ប្រជាពលរដ្ឋ​ទាំងអស់ឱ្យមានទំនុកចិត្ត លើការថែទាំព្យាបាលសុខភាពមាតា ទារកនិងកុមារ ប្រកបដោយគុណភាព ប្រសិទ្ធិភាព និងក្រមសីលធម៌វិជ្ជាជិវៈ។

នាឱកាសនោះលោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការប្រចាំការ នៃក្រសួងសុខាភិបាល បានសំដែង​នូវអំណរសាទរក្នុងឱកាសខួបអនុស្សាវរីយ៍លើកទី៦៧ នៃការបង្កើតទំនាក់ទំនងការទូត រវាងព្រះរាជាណាចក្រ​កម្ពុជា-សាធារណរដ្ឋឆែក ដែលសបញ្ជាក់ពីទំនាក់ទំនងល្អប្រសើរជាប្រពៃណី និងកិច្ចសហប្រតិបត្តិការ​រវាងប្រទេស​ទាំងពីរកាន់តែរីកចម្រើន រឹងមាំ នាំមកនូវភាពសុខដុម និងវឌ្ឍនភាព សេដ្ឋកិច្ច-សង្គម ជានិរន្តរ៍ដល់ប្រជាជន នៃ​ប្រទេសទាំងពីរ ដែលនឹងរួមចំណែកផងដែរ ដល់សន្តិភាព ស្ថិរភាព និងការអភិវឌ្ឍន៍ នៅក្នុងតំបន់ និងពិភពលោក​ទាំងមូល។ ទន្ទឹមនឹងនោះ សាធារណរដ្ឋឆែក ដែលបានសហការគាំទ្រវិស័យសុខាភិបាលកម្ពុជា ជាពិសេសមន្ទីរ​ពេទ្យកុមារជាតិ ជាក់ស្ដែងក្នុងអំឡុងពេលដែលកម្ពុជា និងពិភពលោកបានរងវិបត្តិ នៃការរាតត្បាតជំងឺកូវីដ-១៩ សាធារណរដ្ឋឆែក បានផ្ដល់ជំនួយជាសម្ភារៈបរិក្ខារពេទ្យមួយចំនួនដល់មន្ទីរពេទ្យកុមារជាតិ ក្នុងការទប់ស្កាត់ ឆ្លើយតបការរាតត្បាតជំងឺកូវីដ-១៩។

ជាមួយគ្នានោះដែរ ឯកឧត្តម ជីរី កូហ្សាក (H.E. Jiří Kozák) អនុរដ្ឋមន្ត្រីទី១ នៃក្រសួងការបរទេស សាធារណៈរដ្ឋឆែក បានសម្តែងនូវការកោតសរសើរចំពោះការអភិវឌ្ឍយ៉ាងឆាប់រហ័ស និងឥតឈប់ឈរលើគ្រប់វិស័យ នៅក្នុង​ព្រះរាជាណាចក្រកម្ពុជា រួមទាំងវិស័យសុខាភិបាល ជាពិសេសការគ្រប់គ្រងបាននូវ​ការរីករាលដាល​ជំងឺកូវីដ-១៩ និងប្តេជ្ញាពង្រឹងនិងពង្រីកកិច្ចសហប្រតិបត្តិការក្នុងវិស័យ សុខាភិបាលរវាងប្រទេស​ទាំងពីរ​បន្ថែមទៀត៕ ដោយ ៖ រដ្ឋា