ក្រុមរដ្ឋអាជ្ញាសហព័ន្ធនិយាយថា អតីតអ្នកគ្រប់គ្រងសាលតម្កល់សពនៅសាលាពេទ្យ Harvardរបស់សហរដ្ឋអាមេរិក ស្ថិតក្នុងចំណោមមនុស្ស ៥នាក់ រងការចោទប្រកាន់ដោយគណៈវិនិច្ឆ័យ កាលពីថ្ងៃពុធ ពាក់ព័ន្ធនឹងការចោទប្រកាន់ថា ពួកគេបានលួចលក់បំណែកសាកសពដែលគេបរិច្ចាគដល់សាលា ។

ការិយាល័យមេធាវីរដ្ឋ Pennsylvania របស់សហរដ្ឋអាមេរិក បាននិយាយនៅក្នុងសេចក្តីថ្លែងការណ៍ថា លោក Cedric Lodge វ័យ ៥៥ឆ្នាំដែលត្រូវបានគេបណ្តេញចេញពីការងារកាលពីថ្ងៃទី ៦ ខែមិថុនាកន្លងទៅ និងចុងចោទផ្សេងទៀត រងការចោទប្រកាន់ថាបានអនុវត្តន៍គម្រោងបំណែកសាកសពទីផ្សារងងឹត ប្រហែលចាប់ពីឆ្នាំ ២០១៨ ដល់ឆ្នាំ ២០២២ ។ ចុងចោទម្នាក់រស់នៅទីក្រុង Scranton រដ្ឋ Pennsylvania ។

ក្រុមរដ្ឋអាជ្ញា និយាយថា លោក Lodge ដែលត្រូវបានជួលដោយសាលាពេទ្យ Harvard ស្ថិតនៅទីក្រុង Boston រដ្ឋ Massachusetts កាលពីឆ្នាំ ១៩៩៥ បានអនុញ្ញាតឲ្យអ្នកទិញធំៗចូលសាលតម្កល់សពនៅក្នុងសាលា ដើម្បីពិនិត្យមើលសាកសព និងរើសយកបំណែកសាកសពដែលត្រូវទិញ ។ ភាគច្រើននៃអ្នកទិញ បានលក់បន្តបំណែកសាកសពទាំងនេះ ។

ក្រុមរដ្ឋអាជ្ញាបន្តទៀតថា ជនទី ៦ម្នាក់នេះ កាលពីមុនរងការចោទប្រកាន់នៅរដ្ឋ Arkansas នៅក្នុងការស៊ើបអង្កេតតែមួយពាក់ព័ន្ធនឹងករណីសង្ស័យថាបានលួចបំណែកសាកសពពីសាលតម្កល់សពដែលគាត់ធ្វើការ ។ ទីភ្នាក់ងារព័ត៌មានរ៉យទ័រ ធ្លាប់បានរាយការណ៍កាលពីមុនផងដែរពីការបំពានក្នុងការជួយដូរសាកសពនេះ ។

យោងតាមសេចក្តីរាយការណ៍ពីទូរទស្សន៍ ABC News ដែលលើកប្រភពពីក្រុមចារកិច្ច FBIបានឲ្យដឹងថា គេនៅមិនទាន់ដឹងច្បាស់ភ្លាមៗនោះទេថាតើលោក Lodge ដែលត្រូវបានចាប់ខ្លួនដោយក្រុម FBI កាលពីពុធ ឬអ្នកផ្សេងដែលរងការចោទប្រកាន់ រួមទាំងភរិយារបស់លោក Lodge មានក្រុមមេធាវីការពារក្តីដែរឬទេ ៕