មនុស្សរាប់រយនាក់ នៅថ្ងៃព្រហស្បតិ៍ (ទី១៥ មិថុនា)នេះ បានចូលរួមពិធីបុណ្យសពខ្មាន់កាំភ្លើងជនជាតិប៉ាឡេស្ទីន ដែលត្រូវបានសម្លាប់ដោយកងកម្លាំងអ៊ីស្រាអែល នៅក្នុងការប៉ះទង្គិចគ្នា ដែលបានផ្ទុះឡើង អំឡុងពេលវាយកម្ទេចលំនៅឋានមួយខ្នង នៅតំបន់វ៉េសប៊ែង (West Bank)។

យោធាអ៊ីស្រាអែលបាននិយាយថា កងកម្លាំងរបស់ខ្លួនបានរងការបាញ់ប្រហារ ខណៈពេលដែលពួកគេធ្វើការបំផ្លាញផ្ទះរបស់បុរសប៉ាឡេស្ទីនម្នាក់ ដែលបានសម្លាប់ទាហានអ៊ីស្រាអែលមួយរូប ក្នុងឆ្នាំ២០២២ ហើយបានបាញ់តបតទៅលើខ្មាន់កាំភ្លើងនោះវិញ។

ក្រសួងសុខាភិបាលប៉ាឡេស្ទីនបាននិយាយថា បុរសម្នាក់ត្រូវបានសម្លាប់នៅក្នុងការប៉ះទង្គិចគ្នា ហើយក្រុមប្រដាប់អាវុធប៉ាឡេស្ទីន បានកំណត់អត្តសញ្ញាណគាត់ថា ជាអ្នកប្រយុទ្ធ។ លោក Nabil Abu Rudeineh អ្នកនាំពាក្យរបស់ប្រធានអាជ្ញាធរប៉ាឡេស្ទីនលោក Mahmoud Abbas បានថ្កោលទោសសកម្មភាពរបស់អ៊ីស្រាអែល។

ប៉ាឡេស្ទីន និងក្រុមសិទ្ធិមនុស្ស និយាយថា ការវាយកម្ទេចផ្ទះអ្នកប្រឆាំង គឺជាការដាក់ទណ្ឌកម្មរួមដែលបំពានច្បាប់អន្តរជាតិ តែអ៊ីស្រាអែលនិយាយថា វាជាវិធានការមួយដែលរារាំងអ្នកដទៃពីការវាយប្រហារដ៏គ្រោះថ្នាក់៕