ភ្នំពេញ៖ រដ្ឋមន្ត្រីក្រសួងទេសចរណ៍កម្ពុជា បានព្រមព្រៀងថា នឹងចូលជាសមាជិកនៃអង្គការ ផ្សព្វផ្សាយទេសចរណ៍តំបន់អាស៊ីប៉ាស៊ីភិច ​ហៅកាត់ថា TPO នឹងចាត់មន្ត្រីជំនាញធ្វើការងារជាមួយអង្គការTPOនេះ ដើម្បីពង្រីកការផ្សព្វផ្សាយទីក្រុងទេសចរណ៍សំខាន់ៗរបស់កម្ពុជា ទៅលើទីផ្សារទេសចរណ៍អន្តរជាតិ។

នៅក្នុងជំនួបជាមួយលោក វូ ឃ្យុងហា (WOO Kyoungha) អគ្គលេខាធិការ​អង្គការ​ផ្សព្វផ្សាយ​ទេសចរណ៍ TPO ប្រចាំតំបន់អាស៊ីប៉ាស៊ីហ្វិក ​ល្ងាចថ្ងៃទី១៥នេះខែមិថុនា នៅសណ្ឋាគារ​សុខាភ្នំពេញ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ថ្លែងថា នៅពេលនេះ ក្រសួងទេសចរណ៍​បាន​សម្រេចចាត់មន្ត្រីជំនាញទេសចរណ៍កម្ពុជា​ ធ្វើការងារជាមួយអង្គការTPO ដើម្បីរៀបចំ​ឯកសារទីក្រុងសំខាន់ៗ​របស់ប្រទេសកម្ពុជា ដែលមាន​សក្ដានុពល​ទេសចរណ៍ ដូចជា​រាជធានីភ្នំពេញ ​ក្រុងសៀមរាប​ ក្រុងព្រះសីហនុ ​ក្រុងបាត់ដំបង​ជាដើម វាយតម្លៃដាក់ចូល​ក្នុង​បញ្ជីជាសមាជិកអង្គការ​ផ្សព្វផ្សាយ​ទេសចរណ៍​សម្រាប់​បណ្ដាទីក្រុងនៅក្នុងតំបន់អាស៊ីប៉ាស៊ីភិច នៅក្នុងចំណោមទីក្រុងទេសចរណ៍សំខាន់ៗ​ នានាលើពិភពលោក។

ឯកឧត្តម ជុក ជំនោរ អគ្គនាយកអភិវឌ្ឍន៍ទេសចរណ៍ ​និងសហប្រតិបត្តិការ​អន្តរជាតិ​នៃក្រសួងទេសចរណ៍ ថ្លែងថា ​ការជំរុញឲ្យទីក្រុងទេសចរណ៍សំខាន់របស់កម្ពុជា ដាក់ក្នុងបញ្ជី​ទីក្រុងទេសចរណ៍សំខាន់ៗ​របស់អង្គការTPO នឹងទទួល​បាន​អត្ថប្រយោជន៍​ជាច្រើនជាពិសេស​ការជំរុញកំណើនទេសចរអន្តរជាតិ ​និង​ការ​ផ្សព្វផ្សាយ​គោល​ដៅ​ទីក្រុងទេសចរណ៍កម្ពុជា លើឆាកអន្តរជាតិ។

ក្នុងជំនួបនេះ លោកអគ្គលេខាធិការ វូ ឃ្យុងហា ​បាន​មើលឃើញ​ និង​បាន​កោតសរសើរ​ចំពោះការ​គ្រប់គ្រង ការអភិវឌ្ឍនៅតាមបណ្ដាទីក្រុងមួយចំនួនរបស់កម្ពុជា​ជាពិសេសរាជធានីភ្នំពេញ ក្រុងសៀមរាប ក្រុងព្រះសីហនុ ​ក្រុងបាត់ដំបងជាដើម​ ក៏អាចក្លាយជាសមាជិកអង្គការ TPO ។

លោកអគ្គលេខាធិការបន្តថា ​តាមរយៈការចូលសមាជិកTPO ​ក្រៅ​ពី​ការ​ផ្សព្វផ្សាយ​គោលដៅ​ទីក្រុងទេសចរណ៍សំខាន់ៗ​ទៅលើពិភពលោក​ វា​ក៏នឹង​អនុញ្ញាត​ឱ្យរដ្ឋបាលក្រុងសមាជិកនីមួយៗ​អាចផ្លាស់ប្ដូរ​បទពិសោធន៍ក្នុងការអភិវឌ្ឍ ​ការគ្រប់គ្រង ​ការរៀបចំ​សោភ័ណភាព ការ​ពង្រីកសក្ដានុពលទេសចរណ៍​ ក៏ដូចជាការដោះស្រាយបញ្ហាប្រឈមនានា​ពីគ្នាទៅវិញទៅមក៕ អត្ថបទ៖ ស៊ុម សុខជា​