​​ប្រណាំង​កង់៖ ​ព្រឹត្តិការណ៍​ប្រណាំង​កង់ Grand Tour, Giro d’Italia​ បាន​បញ្ចប់​ជោគជ័យ​នៅ​ដំណាក់​កាល​ទី៤ ខណៈ​កីឡាករអាមេរិក Joe Domborowski​ ឈ្នះ​លើកដំបូង​ក្នុង​អាជីព​នៅ Grand Tour​។ ​​​ដំណាក់កាល​ទី៤ ដែល​មាន​ចម្ងាយ​ផ្លូវ ១៨៧​គីឡូម៉ែត្រចេញពី Piacenza ឆ្ពោះ​ទៅ Sestola ​កីឡាករ​របស់​ក្រុម UAE Emirate ជា​អ្នក​មកដល់​ទី​ព្រ័ត្រ​មុនគេ​។

​​កីឡាករ​វ័យ ២៩​ឆ្នាំ​រូប​នេះ​ធ្វើ​បាន​ល្អ​ នៅ​ចំណុច​ឡើង​ទួល​ចុង​ក្រោយ​ដែល​មាន​ភ្លៀង​ធ្លាក់ និង​ខ្យល់​ខ្លាំង​។​ ​លេខ​២ ​ក្នុង​ដំណាក់​កាល​គឺ​​​កីឡាករអ៊ីតាលី Alessandro De Marchi​ តាម​ពីក្រោយ​អ្នកឈ្នះ ១២​វិនាទី ខណៈ​លេខ​៣ Filippo Fiorelli​ យឺត​ជាង ២៧​វិនាទី​។​ ​ក្រោយ ៤​ដំណាក់កាល​នេះ Alessandro De Marchi​ របស់​ក្រុម Israel Start-up Nation ជា​អ្នក​នាំ​មុខ​គេ​ក្នុង​តារាង​រួមមាន​វេលា​សរុប ១៣ម៉ោង ៥០នាទី ៤៤វិនាទី ដោយ​នាំមុខ​អ្នក​លេខ​២ ២៧វិនាទី និង​លេខ៣ កីឡាករ​ប៊ែ​ល​ហ្ស៊ិ​ក Louis Vervaeke​ យឺត​ជាង ៤២វិនាទី​។ ​ដំណាក់កាល​ទី៥ ថ្ងៃ​ពុធ​នេះ​ចេញដំណើរ​ពី Modena ទៅ Cattolica ​ចម្ងាយ​ផ្លូវ ១៧៧​គីឡូម៉ែត្រ​ជា​ដំណាក់កាល​ប្រណាំង​លើ​ស្ថានភាព​ផ្លូវ​រាបស្មើ​៕

​អត្ថបទ​៖​នាង សុភា​វុ​ធ