ស៊ីហ្គេម៖ ឯកឧត្ដម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានឲ្យដឹងថា កីឡា ៤០ប្រភេទត្រូវបានកំណត់ទីលានប្រកួតលើទីតាំងធំៗចំនួន ៥ សម្រាប់ព្រឹត្តិការណ៍ស៊ីហ្គេមនាឆ្នាំ២០២៣ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកែប និងខេត្តកំពត។
ការលើកឡើងនេះបន្ទាប់ពីឯកឧត្ដមបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និងជាអនុប្រធានអចិន្ត្រៃយ៍ CAMSOC បានដឹកនាំកិច្ចប្រជុំស្ដីពីការកំណត់ទីតាំង នៃទីលានប្រកួតកីឡាស៊ីហ្គេមកាលពីថ្ងៃទី១១ ខែឧសភា ដើម្បីត្រៀមស្នើសុំសេចក្ដីសម្រេចចុងក្រោយពីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងប្រធាន CAMSOC នាពេលខាងមុខ។ ឯកឧត្តម វ៉ាត់ ចំរើន បានបញ្ជាក់ថា ក្នុងចំណោមទីតាំងធំៗទាំង ៥ កីឡាភាគច្រើនត្រូវប្រកួតនៅរាជធានីភ្នំពេញ រីឯខេត្តសៀមរាបត្រូវរៀបចំការប្រណាំងកង់ ខេត្តព្រះសីហនុត្រូវរៀបចំការប្រកួតកីឡាម៉ូតូទឹក និងទូកក្ដោង ហើយខេត្តកែបត្រូវប្រកួតកីឡាទ្រីយ៉ាងត្លុង។ ចំណែកខេត្តកំពតគឺត្រៀមរៀបចំការប្រកួតកីឡាទូកប្រពៃណី ទូកកានូ និងកាយ៉ាក់ តែសហព័ន្ធបានស្នើឲ្យគណៈកម្មការជំនាញ ចុះពិនិត្យទីតាំងថ្មីមួយទៀតនៅជាយក្រុងភ្នំពេញ មុនការសម្រេចចុងក្រោយ។
រដ្ឋលេខាធិការក្រសួងទេសចរណ៍ដដែលបានបន្ថែមថា បន្ទាប់ពីពិភាក្សាលើការកំណត់ទីតាំង នៃទីលានប្រកួត កិច្ចប្រជុំក៏បានពិភាក្សាលើកម្មវិធីបើក-បិទការប្រកួតកីឡាស៊ីហ្គេមឆ្នាំ២០២៣ ផងដែរ តែដោយសារកម្មវិធីបើក-បិទព្រឹត្តិការណ៍ប្រវត្តិសាស្ដ្រនេះ ត្រូវរៀបចំគម្រោងលម្អិតពីដើមរហូតដល់ចប់ គណៈអចិន្ដ្រៃយ៍ CAMSOC នឹងបន្ដពិភាក្សាគ្នានាពេលក្រោយបន្ថែមទៀតនា។ គួរដឹងថា គិតត្រឹមថ្ងៃនេះ កម្ពុជាសល់ពេល ៧២២ថ្ងៃទៀតប៉ុណ្ណោះសម្រាប់ការត្រៀមខ្លួនធ្វើម្ចាស់ផ្ទះការប្រកួតកីឡាស៊ីហ្គេម ដែលគ្រោងប្រារព្ធពិធីបើកផ្លូវការនៅពហុកីឡដ្ឋានជាតិមរតកតេជោនាថ្ងៃទី៥ ខែឧសភា និងពិធីបិទនៅថ្ងៃទី១៧ ខែឧសភា ឆ្នាំ២០២៣ មុនបន្ដធ្វើម្ចាស់ផ្ទះការប្រកួតកីឡាអាស៊ានប៉ារ៉ាហ្គេមចាប់ពីថ្ងៃទី១ ដល់ថ្ងៃទី១០ ខែមិថុនា ឆ្នាំ២០២៣ ដដែល៕
អត្ថបទ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
