​ប្រធានាធិបតី​ប្រទេស​អាហ្វ្រិក​ខាងត្បូង លោក Cyril Ramaphosa បាន​និយាយ​កាលពី​ថ្ងៃ​សុក្រ បន្ទាប់ពី​ជំនួប​រវាង​មេដឹកនាំ​អាហ្វ្រិក និង​ប្រធានាធិបតី​អ៊ុយ​ក្រែ​ន​លោក Volodymyr Zelenskiy ក្នុង​ទីក្រុង Kyiv អំឡុងពេល​លោក​បាន​អំពាវនាវ​ឱ្យមាន​លំហូរ​គ្រាប់​ធញ្ញជាតិ​ដោយ​សេរី​ថា​បណ្តា​ប្រទេស​អាហ្វ្រិក​បាន​ត្រៀមខ្លួន​ដើម្បី​ចូលរួម​បន្ថែមទៀត​ក្នុង​កិច្ចព្រមព្រៀង​សន្តិភាព​នៅក្នុង​ប្រទេស​អ៊ុយ​ក្រែ​ន​។​

​ក្នុងអំឡុង​សន្និសីទ​ព័ត៌មាន​រួមគ្នា​ជាមួយ​មេដឹកនាំ​អ៊ុយ​ក្រែ​ន លោក Ramaphosa បាន​និយាយថា​មេដឹកនាំ​អាហ្វ្រិក​នៅទីនេះ​ដើម្បី​ចែករំលែក​ទស្សនៈ​របស់​ទ្វីបអាហ្វ្រិក​លើ​ការស្វែងរក​សន្តិភាព​នៅ​អ៊ុយក្រែ​ន​។​

​គណៈប្រតិភូ​អាហ្វ្រិក រួមមាន​មេដឹកនាំ​ប្រទេស​សេ​ណេ​ហ្គា​ល់ អេ​ហ្ស៊ី​ប ហ្សំ​ប៊ី អាហ្វ្រិក​ខាងត្បូង និង​ប្រជុំ​កោះ​កូ​ម៉ូ​រ៉ូ បាន​ជួប​លោក Zelenskiy បន្ទាប់ពី​ត្រូវបាន​ស្វាគមន៍​នៅ​ទីក្រុង Kyiv ដោយ​មី​ស៊ី​ល​របស់​រុស្ស៊ី​ជាច្រើន​គ្រាប់​។ ពួកគេ​មាន​ផែន​ការជួប​ប្រធានាធិបតី​រុស្ស៊ី លោក វ្ល៉ា​ឌី​មៀ ពូ​ទីន នៅ​ទីក្រុង St Petersburg (​សេន ភី​ត​ធើ​ស​ប៊ើ​ក​) នៅ​ថ្ងៃ​សៅរ៍​ទី​១៧ ខែមិថុនា​នេះ​។​

​លោក Ramaphosa បាន​និយាយ​កាលពី​ថ្ងៃ​សុក្រ​ថា ត្រូវតែមាន​ការបន្ធូរបន្ថយ​ភាព​តានតឹង​ពី​ភាគី​ទាំងសងខាង​នៃ​សង្គ្រាម​នៅ​អ៊ុយ​ក្រែ​ន ហើយ​សន្តិភាព​គួរតែ​ត្រូវធ្វើ​ឲ្យ​សម្រេច​ជោគជ័យ​តាមរយៈ​មធ្យោបាយ​ការចរចា និង​ការទូត​។ ប្រធានាធិបតី​ប្រទេស​ហ្សំ​ប៊ី លោក Hakainde Hichilema បាន​និយាយថា វា​ជា​រឿង​សំខាន់​ដែល យើង​នៅក្នុង​ទ្វីបអាហ្វ្រិក រួមចំណែក​ដល់​សន្តិភាព​នៅ​អ៊ុយ​ក្រែ​ន​៕