លោក Daniel Ellsberg ដែលជាអ្នកទម្លាយឯកសារសម្ងាត់ដ៏ល្បីល្បាញម្នាក់ ក្នុងប្រវត្តិសាស្ត្រសហរដ្ឋអាមេរិក និងជាអ្នកលាតត្រដាងការបំភ័ន្តរបស់រដ្ឋាភិបាល​សហរដ្ឋអាមេរិក​ពីសង្គ្រាម​វៀតណាម ដោយការបញ្ចេញឯកសារសម្ងាត់របស់មន្ទីរបញ្ចកោណ បានទទួលមរណភាពហើយក្នុងវ័យ ៩២ឆ្នាំ។

ដោយធ្លាប់ត្រូវបានដាក់ឈ្មោះថា ជា «បុគ្គលដ៏គ្រោះថ្នាក់បំផុតនៅអាមេរិក» ដោយមន្ត្រីជាន់ខ្ពស់របស់សហរដ្ឋអាមេរិក លោក Henry Kissinger អតីតអ្នកវិភាគយោធាអាមេរិកលោក Ellsberg បានចាប់ផ្តើមឲ្យមានសមរភូមិសេរីភាពសារព័ត៌មានដ៏ធំ នៅក្នុងទសវត្សរ៍ឆ្នាំ១៩៧០។

លោក Ellsberg បានធ្វើការនៅវិទ្យាស្ថានស្រាវជ្រាវគោលនយោបាយដ៏មានឥទ្ធិពល ជាក្រុមហ៊ុនសាជីវកម្ម RAND ដែលមានភាពលេចធ្លោបំផុតក្នុងសម័យសង្រ្គាមវៀតណាម។ ទីនោះហើយគឺជាកន្លែងដែលមន្ទីរបញ្ចកោណបានបញ្ជូនរបាយការណ៍ថតចម្លងដ៏សម្ងាត់បំផុតចំនួនពីច្បាប់ ដែលពិពណ៌នាលម្អិតពីការចូលដៃចូលរបស់សហរដ្ឋអាមេរិក ក្នុង​ប្រទេសវៀតណាមពីឆ្នាំ១៩៤៥ ដល់ឆ្នាំ១៩៦៧។

លោក Ellsberg បានលួចយកឯកសារនោះពីការិយាល័យក្រុមហ៊ុន RAND ចម្លងឯកសារនោះ ហើយចុងក្រោយ បានចែកចាយឯកសារជាមួយប្រព័ន្ធផ្សព្វផ្សាយ។ លោក Ellsberg និងសហការីនៅក្រុមហ៊ុន RAND ម្នាក់ នៅទីបំផុត ត្រូវបានចោទប្រកាន់ពីបទធ្វើចារកម្ម ការលួច និងការសមគំនិត។ ប៉ុន្តែចៅក្រមបានច្រានចោលករណីនេះ ដោយសារកំហុស​របស់រដ្ឋាភិបាល បន្ទាប់ពីឯកសារនោះលេចឡើង សេតវិមានបានបញ្ជាឲ្យការមានការចូលលួច នៅការិយាល័យនៃពេទ្យវិកលចរិតរបស់លោក Ellsberg ដើម្បីស្វែងរកភ័ស្តុតាង។

ឯកសារដែលធ្លាប់ជាឯកសារសម្ងាត់បំផុតដែលលោក Ellsberg បានធ្វើឲ្យបែកធ្លាយនោះ ឥឡូវនេះអាចរកអានបានតាមបណ្ដាញអ៊ិនធឺណិត នៅលើគេហទំព័របណ្ណាសារជាតិ៕