ប្រជាជនស៊ែរប៊ីរាប់ម៉ឺននាក់ បានរៀបចំការប្រមូលផ្ដុំព្រមគ្នានៅក្នុងទីក្រុងចំនួនបួន​កាលពីថ្ងៃសៅរ៍ (១៧ មិថុនា) ដែលជាការតវ៉ាប្រចាំសប្តាហ៍ទី ៧ ចាប់តាំងពី​ការ​បាញ់​ប្រហារ​ទ្រង់ទ្រាយ​ធំ​ចំនួន​ពីរ​បាន​បង្ក​ឱ្យមានប្រតិកម្មប្រឆាំងរដ្ឋាភិបាល។

នៅរដ្ឋធានី Belgrade ក្រុមបាតុករបានបិទផ្លូវហាយវេដ៏សំខាន់មួយ ហើយទាមទារ​ឱ្យ​សមាជិក​រដ្ឋាភិបាល​ទទួល​ខុសត្រូវចំពោះការអនុញ្ញាតឱ្យមានវប្បធម៌ នៃអំពើហិង្សា ដែលពួក​គេ​បាន​និយាយ​ថា​ជា​ដើមហេ​តុចំពោះការសម្លាប់មនុស្សចំនួន ១៨ នាក់កាលពីថ្ងៃទី ៣ និងទី ៤ ខែ​ឧសភា។

ប្រទេសស៊ែរប៊ីត្រូវបានរង្គោះរង្គើកាលពីខែមុន ដោយ​ការ​បាញ់​ប្រហារ​ដែល​មិន​ធ្លាប់​មាន​ពី​មុន​មកចំនួន​ពីរ​ករណីបានកើតឡើងនៅថ្ងៃជាប់ៗគ្នា។ ក្រុមអ្នកតវ៉ាកំពុង​ទាមទារ​ឱ្យ​មាន​ការ​លាលែង​ពី​តំណែងរ​បស់រដ្ឋមន្ត្រីមហាផ្ទៃប្រទេសស៊ែរប៊ីលោក Bratislav Gasic និង​ប្រធាន​សេវា​សម្ងាត់​លោក Aleksandar Vulin ដែលពួក​គេ​បាន​ស្តី​បន្ទោស​អ្នក​ទាំង​ពីរ​នោះ​ចំពោះ​ការ​បរាជ័យ​ក្នុង​ការ​នាំខ្លួន​ក្រុម​ឧក្រិដ្ឋជនមកកាត់ទោស។

នាយករដ្ឋមន្ត្រីស៊ែរប៊ីលោកស្រី Ana Brnabic បាននិយាយកាលពីសប្តាហ៍មុនថា លោ​ក​ស្រីសុ​ខ​ចិត្ត​លាលែង​ពីតំណែង ហើយបានអញ្ជើញភាគីក្រុមប្រឆាំងដែលបានគាំទ្រការតវ៉ា ឱ្យចូលរួម​ការ​សន្ទនា​។ ប៉ុន្តែបណ្ដាមេដឹកនាំបាតុករបាននិយាយថា ពួកគេនឹង​មិន​និយាយ​ជា​មួយ​រដ្ឋាភិបាល​ទេ​រហូត​ដល់​ការទាមទាររបស់ពួកគេត្រូវបានបំពេញ៕ អត្ថបទ៖ ស្រីទាវ