ភ្នំពេញ៖ បណ្តាប្រជាសហគមទេសចរណ៍ មកតាមបណ្តាខេត្តនានា បាននាំគ្នាថ្លែងអំណរគុណ​រាជរដ្ឋាភិបាល ដែលបានស្ថាបនាផ្លូវថ្នល់ស្អាតខ្វាត់ខ្វែង និងចូលទៅដល់សហគមន៍ទេសចរណ៍ និងអេកូទេសចរណ៍ ទាក់ទាញភ្ញៀវទេសចរជាតិអន្តរជាតិ​អញ្ជើញទស្សនាកម្សាន្ត និង​ការជំរុញកំណើន​សេដ្ឋកិច្ចប្រជាពលរដ្ឋក្នុងសហគមន៍។

នៅក្រោយពិធីបិទសន្និបាតសហគមន៍ទេសចរណ៍របស់សមាគមន៍បណ្តាញប្រជាជនកម្ពុជា ថ្ងៃទី១៩ ខែមិថុនានេះ បណ្តាប្រជាសហគមន៍ទេសចរណ៍មកពីខេត្តតាកែវ កំពត កោះកុង និងខេត្តបាត់ដំបង ជាដើម បានថ្លែងដូចគ្នាថា បច្ចុប្បន្ន រាជរដ្ឋាភិបាលបានខិតខំស្ថាបនាផ្លូវស្អាត​ខ្វាត់ខ្វែង ពី​រាជធានី​ភ្នំពេញឆ្ពោះទៅកាន់បណ្តាសហគមន៍ទេសចរណ៍នានាទូទាំងប្រទេស បានធ្វើឲ្យសហគមន៍​ទាំងអស់នោះទទួលបានភ្ញៀវទេសចរជាតិអន្តរជាតិទៅទស្សនាជា​ហូរហែ ជំរុញកំណើន​សេដ្ឋកិច្ច​សហគមន៍ ហើយធានាការអភិរក្សធនធានធម្មជាតិ ​ការពារសត្វព្រៃ ព្រៃឈើទុកជូនភ្ញៀវ​ទៅទស្សនា។

ឯកឧត្តម នី ផល្លី រដ្ឋលេខាធិការក្រសួងទេសចរណ៍ និងជាប្រធានក្រុមប្រឹក្សាភិបាលសមាគមន៍​បណ្តាញ​ប្រជាជនកម្ពុជា ថ្លែងថា ​បច្ចុប្បន្ន ​បណ្តាសហគមន៍ទេសចរណ៍ និង​អេកូទេសចរណ៍​មួយចំនួនធំ ​គឺមានផ្លូវថ្នល់ស្អាត ​ហើយអាចនាំទេសចរជាតិអន្តរជាតិអញ្ជើញ​ទស្សនាងាយស្រួល ហើយ​បច្ចុប្បន្នសមាគមបណ្តាញប្រជាជន​កម្ពុជា ​កំពុងជំរុញឲ្យសហគមន៍នាំគ្នារៀបចំ​សេវា​ទេសចរណ៍ល្អ ដើម្បីទាក់ទាញអញ្ជើញទស្សនាកាន់តែច្រើន។

ឯកឧត្តម បញ្ជាក់ថា នៅពេលបច្ចុប្បន្ននេះ ​ទូទាំង​ប្រទេសមានរាជរដ្ឋាភិបាលបានផ្តល់​ច្បាប់​អនុញ្ញាត​ត្រឹមត្រូវបង្កើតសហគមមានប្រមាណជាង ​២៣០០សហគមន៍ ​ក្នុងនោះ ​មាន​សហគមន៍​ប្រមាណតែ ជាង ១២៥ប៉ុណ្ណោះ​ ដែលមានសកម្មភាពទេសចរណ៍ ​និងមានការផ្តល់​សេវា​ល្អជូនភ្ញៀវទេសចរ​ទៅ​ទស្សនាកំសាន្ត៕អត្ថបទ៖ ស៊ុម សុខជា