ទីភ្នាក់ងារព័ត៌មាន Ukrinform ដែលគ្រប់គ្រងដោយរដ្ឋាភិបាលអ៊ុយក្រែន បានដកស្រង់សម្តីមន្ត្រីអ៊ុយក្រែនម្នាក់ ដែលបាននិយាយកាលពីថ្ងៃអាទិត្យថា ពុំមានហានិភ័យផ្នែគសុវត្ថិភាពនៅក្នុងរោងចក្រថាមពលនុយក្លេអ៊ែរ Zaporizhzhia នោះទេ។

យោងតាមលោក Yuriy Malashko អភិបាលតំបន់ Zaporizhzhia ក្នុងប្រទេសអ៊ុយក្រែនបានឲ្យដឹងថា អាងស្តុកទឹក Kakhovka ដែលផ្គត់ផ្គង់ទឹកសម្រាប់ប្រព័ន្ធត្រជាក់នៅរោងចក្រ Zaporizhzhia បន្តឃើញកម្រិតទឹករបស់វាធ្លាក់ចុះយ៉ាងខ្លាំង បន្ទាប់ពីទំនប់វារីអគ្គិសនី Kakhovka នៅភាគខាងត្បូងប្រទេសអ៊ុយក្រែនត្រូវបានបំផ្លាញ។

លោក Malashko បាននិយាយថា ទោះជាយ៉ាងណា ការផ្គត់ផ្គង់ទឹកពីអណ្តូងទឹកនៅជិតរោងចក្រថាមពលគឺធម្មតា ដែលជួយរក្សាកម្រិតទឹកនៃអាងទឹកត្រជាក់នៅរោងចក្រក្នុងកម្រិតធម្មតា។ ភាគីរុស្ស៊ីបាននិយាយកាលពីថ្ងៃអាទិត្យថា កម្រិតខ្ពស់នៃទឹកជំនន់បន្ទាប់ពីការបាក់ទំនប់បានឆ្លងកាត់ផ្នែកដែលគ្រប់គ្រងដោយប្រទេសរុស្ស៊ីនៅទីក្រុង Kherson បណ្តាលឱ្យមនុស្ស ៣៥ នាក់ស្លាប់។

យោងតាមប្រទេសរុស្ស៊ីបានឲ្យដឹងថា ទឹកជំនន់នៅទីក្រុង Nova Kakhovka និងកន្លែងមួយចំនួនផ្សេងទៀតនៅជិតរោងចក្រវារីអគ្គិសនី Kakhovka បានស្រកទាំងស្រុង។

អគារសរុបចំនួន ២៣.០០០កន្លែង ត្រូវបានជន់លិចដោយទឹកជំនន់។ ក្នុងរយៈពេល ២៤ ម៉ោងកន្លងទៅនេះ កម្រិតទឹកនៃអាងស្តុកទឹក Kakhovka បានធ្លាក់ចុះជាង ៤ ម៉ែត្រ ហើយវាត្រូវបានគេរំពឹងថា នឹងអស់ទឹកនៅមុនថ្ងៃច័ន្ទ។

ស្ថានភាពរដ្ឋក្នុងគ្រាអាសន្ន ត្រូវបានដាក់នៅក្នុងផ្នែកដែលគ្រប់គ្រងដោយរុស្ស៊ីនៅទីក្រុង Kherson ដោយមានពលរដ្ឋជិត ៨.០០០នាក់ ត្រូវបានជម្លៀសចេញ។