ភ្នំពេញ៖ ស្របពេលការបោះឆ្នោតជ្រើសតាំងតំណាងរាស្ដ្រ នីតិកាលទី៧ ខិតជិតមកដល់ ប្រធានគណៈកម្មការរៀបចំការបោះឆ្នោតខេត្តកំពង់ស្ពឺ ថ្លែងថា ឯកសារបញ្ជាក់អត្តសញ្ញាណ ជាឯកសារសំខាន់សម្រាប់ប្រើប្រាស់ ក្នុងករណីអត្តសញ្ញាណប័ណ្ណបាត់ ឬខូច។
លោក ព្រំ គីមថៃ ប្រធានគណៈកម្មការរៀបចំការបោះឆ្នោតខេត្តកំពង់ស្ពឺ បានឲ្យដឹងថា ស្របពេលការបោះឆ្នោតតំណាងរាស្ត្រនៅសល់រយៈពេល១ខែទៀត គ.ជ.ប កំពុងត្រៀមដំណើរការផ្តល់ឯកសារបញ្ជាក់អត្តសញ្ញាណជូនប្រជាពលរដ្ឋមានឈ្មោះក្នុងបញ្ជីឈ្មោះបោះឆ្នោត ដែលជាឯកសារប្រើប្រាស់សម្រាប់បម្រើការបោះឆ្នោត ក្នុងករណីបងប្អូនប្រជាពលរដ្ឋបានបាត់បង់ ឬខូចអត្តសញ្ញាណរបស់ខ្លួនដោយប្រការណាមួយ។
លោក បន្តថា ក្រៅពីប្រសិនប្រជាពលរដ្ឋមិនមានអត្តសញ្ញាណប័ណ្ណនោះ គឺប្រជាពលរដ្ឋអាចស្នើឯកសារបញ្ជាក់អត្តសញ្ញាណពីគណៈកម្មការឃុំ-សង្កាត់រៀបចំការបោះឆ្នោត ដើម្បីប្រើប្រាស់សម្រាប់ការបោះឆ្នោតនាពេលខាងមុខ។
ជាមួយគ្នា ប្រធានគណៈកម្មការរៀបចំការបោះឆ្នោតខេត្តកំពង់ស្ពឺ បានអំពាវនាវដល់ប្រជាពលរដ្ឋ សូមថែរក្សារាល់ឯកសារទាំងឡាយបម្រើដល់ការបោះឆ្នោតឲ្យបានត្រឹមត្រូវ ដើម្បីចូលរួមការបោះឆ្នោតឲ្យបានគ្រប់ៗគ្នា។
គួរបញ្ជាក់ថា ការផ្តល់ឯកសារអត្តសញ្ញាណប័ណ្ណមានរយៈពេល ៣០ថ្ងៃ ពីថ្ងៃទី២២ ដល់ថ្ងៃទី២១ ខែកក្កដា ឆ្នាំ២០២៣ ខណៈប្រជាពលរដ្ឋមានឈ្មោះក្នុងបញ្ជីបោះឆ្នោតខាងមុខចំនួនជាង៩លាន៧សែននាក់៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
